Алишер Никимбаев: "Мундиал учун фақат битта майдонни томошабинлар сабаб қабул қилмай турибмиз"

"Қатар мундиални ўтказишга тайёр. 7 та стадион 100% тайёр. Улар синовдан ўтказилган. Фақатгина битта стадион расмий тарзда қабул қилингани йўқ. Ундаги муаммо майдон ҳолати ёки кийиниш хоналари эмас, балки мухлисларнинг ташриф буюришида. Масалан, 86 минг томошабинни ўз бағрига сиғдира оладиган майдонга ташриф буюрадиган мухлисларнинг метродан чиқиб, ичкарига кириши учун маълум вақт керак бўлади. Уларнинг кўпчилиги бир вақтда ташриф буюради ва бу ичкарига киришда тирбандлик келтириб чиқариши мумкин. Ёдингизда бўлса, яқинда бўлиб ўтган ЕЧЛ финалида шундай муаммо юзага келганди. Шу боис, бундай ҳолат кузатилишининг олдини олиш зарур. Жамоалар учун майдон тайёр. Улар бугуноқ ташриф буюриб, ўйин ўтказиши мумкин. Фақатгина мухлисларга шароит яратиш билан боғлиқ муаммо мавжуд. Шуни текширмасдан туриб, мусобақани қабул қилиб бўлмайди. Август-сентябрь оралиғида учрашув ўтказсак, кейин унинг тайёр эканлигини айта оламиз", — деди Никимбаев.