Александр Лобанов: “Дуранг адолатли бўлди”

Ушбу турда “Бунёдкор” ўзу уйида “Пахтакор”ни қабул қилди ва 1:1 ҳисобида дуранг натижа қайд этди. Учрашувдан сўнг “шерлар” клуби дарвозабони Александр Лобанов ўз фикрлари билан ўртоқлашди.

“Ҳеч қачон дерби учрашувлари осон бўлмайди. Ушбу баҳсда “Бунёдкор” ҳам биз ҳам ғалаба қозонишимиз мумкин эди. Афсуски бугун биз ғалаба қозона олмадик. “Қалдирғочлар”га қарши ўйинда бироз омадимиз келмади. Бизни қўллаб-қувватлаб туриш учун стадионга ташриф буюрган мухлисларимизга рахмат айтмоқчиман. Қанчалик яхши ўйин кўрсатсак мухлисларимиз бизга ишонишда давом этади, бу биз учун жуда ҳам муҳим. Ўйин жихатидан олиб қарайдиган бўлсак, дуранг адолатли бўлди. Бугун мухлислар икки хил футбол гувоҳи бўлишди. 

Биринчи бўлимда рақибимиз биздан устун келган бўлса иккинчи бўлимда биз "Бунёдкор"дан кўра кучлироқ ўйин намойиш этдик. Агарда учрашувдаги бўлимлар билан ҳисоблайдиган бўлсак ушбу баҳс тенг курашлар остида ўтди, деб ўйлайман. Рақиб дарвозасини ишқол қилишимиз учун бир қатор вазиятларни яратдик, афсуски улардан фақат биттасидан фойдаландик холос. Яратилган ҳар бир имкониятдан 100 фоиз фойдалиб бўлмайди. 1 очкони қўлга киритган бўлсак ҳам бундан мамнунмиз”, - дейди “Пахтакор” клуби дарвозабони Александр Лобанов.