JCH-2014. Mundial ishtirokchilari - Xorvatiya

Avvalroq "A" guruhining ikki vakili Meksika va Braziliya terma jamoalari haqida yozgan edik.
Endigi navbat "A" guruhining boshqa bir vakili Xorvatiya terma jamoasiga.

Bu terma jamoani hozirda Niko Kovach boshqarib bormoqda. Xorvatiya terma jamoasi Jahon chempionati saralash bosqichida ham "A" guruhidan joy olib, ikkinchi o'rinni qo'lga kiritgan edi. Keyin esa pley-off o'yinida Islandiya terma jamoasini mag'lubiyatga uchratib, mundialga ishtirok etish huquqini qo'lga kiritdi.
Xorvatiya har bir musobaqada chaqilmas yong'oq vazifasini bajarib keladi. Ushbu terma jamoa grandlar qatorida etirof etilmasada, lekin har qanday raqibga qarshi etarli qarshiliklarni namoyish etib bera olishadi. Xorvatiyani o'rtamiyona jamoalarning grandi deb atasak to'g'riroq bo'lardi.

Braziliya stadionlarida ham xorvatlar ko'pchilikni tashkil etishsa kerak

Xorvatiya ancha boy tarixga ega jamoa hisoblanadi. Bu erda har doim etarli iqtidor sohiblari topilgan va topiladi. Braziliyada bo'lib o'tadigan mundialda ushbu terma jamoa safida ko'pgina kuchli va etakchi futbolchilar to'p surishadi. Xususan Dario Srna, Deyan Lovren, CHorluka, Pranich, Luka Modrich, Ivan Rakitich, Ivan Perishich, Mateo Kovachich, Mario Manjukich va Ivica Olich singari futbolchilarni futbol muxlislari yaxshigina tanishadi.
Bu terma jamoa asosiy vazifasi bu guruh bosqichidan o'tish va imkon qadar uzoqroqqa borish hisoblanadi.
Har bir katta musobaqalarda Xorvatiya tarkibidan yarq etib bir futbolchi chiqib keladi. Evro-2012 chempionatida Mario Manjukich o'zining chiroyli gollari bilan ko'pchilikka qiziqish uyg'otgan va "Bavariya" tarkibiga ko'chib o'tgan edi. Bu safargi yangi nom kim bo'lishini esa chempionati davomida bilib olamiz. Bu nomga davogarlik qilayotgan futbolchilar anchagina topiladi. Ayni paytda tarkibga kiritilgan Mario Pashalich, Sammir va Duyee CHop kabi futbolchilar mundial topilmalaridan biri bo'lishi mumkin.
Xorvatiya terma jamoasi jamoaviy o'yin evaziga har qanday raqibini dovdiratib qo'yishi mumkin. Dario Srna, Ivan Rakitich, Luka Modrich va Mario Manjukich kabi etakchi futbolchilardan xorvatiyalik futbol ishqibozlarining umidlari katta. Aynan shu etakchi futbolchilarning o'yini ko'p narsani hal etib beradi.

Xorvatiya muxlislari har doim o'z suyuklilarini ajoyib tarzda qo'llab-quvvatlashadi

Xorvatiya terma jamoasi 1990 yilda tashkil topgan bo'lib, 1992 yildan buyon FIFA va UEFA ishtirokchisi sifatida turnirlarda qatnashib keladi. Xorvatiya 1994 va 1998 yilllarda o'zlarining yorqin o'yinlarini ko'rsatib, ko'pchilik muxlis va mutaxassislar etiborini qozonishgan.
Xorvatiya safida Zvonimir Boban, Davor SHuker, Yosip SHimunich, Dario SHimich, Robert Kovach va ayni paytdagi jamoa bosh murabbiyi Niko Kovach singari taniqli va kuchli futbolchilar o'ynashgan.

Jamoa etakchisi - Dario Srna

Xorvatiya terma jamoasi haqida:

Tashkil topgan yil: 1990

Qitasi: Evropa

Bosh murabbiy: Niko Kovach

Jamoa sardori: Dario Srna

Eng ko'p maydonga tushgan futbolchi: Dario Srna (110 o'yin)

Eng yaxshi to'purar: Davor SHuker (45 gol)

Ilk o'yini: Xorvatiya - SHveycariya 4:0 (1940 yil), Xorvatiya - AQSH 2:1 (1990 yil)

Yirik g'alabalari: Xorvatiya - Avstraliya 7:0 (1998 yil), Xorvatiya - Andorra 7:0 (2006 yil)

Eng yirik mag'lubiyatlari: Germaniya - Xorvatiya 5:1 (1941 yil), Germaniya - Xorvatiya 5:1 (1942 yil), Angliya - Xorvatiya 5:1 (2009 yil)
FIFA reytingidagi o'rni: 16

Erishgan yutuqlari: Jahon chempionati bronza medali sohibi (1998)

Xorvatiyalik afsonaviy hujumchi Davor SHuker

Xorvatiyaning kengaytirilgan tarkibi:

Darvozabonlar - Stipe Pletikosa ("Rostov", Rossiya), Daniel Subashich ("Monako", Franciya), Oliver Zelenika ("Lokomotiv", Xorvatiya);

Himoyachilar - Dario Srna ("SHaxter", Ukraina), Deyan Lovren ("Sautgempton", Angliya), Vedran CHorluka ("Lokomotiv", Rossiya), Gordon SHildenfeld ("Dinamo" Moskva, Rossiya), Daniel Pranich ("Panatinaikos", Greciya), Ivan Strinich ("Dnepr", Ukaina), Domagoy Vida ("Dinamo", Kiev), SHime Vrsalko ("Jenoa", Italiya), Igor Bubnich ("Udineze", Italiya),

Yarim himoyachilar - Luka Modrich ("Real", Ispaniya), Ivan Rakitich ("Sevilya", Ispaniya), Niko Kranchar ("Kuinz Park Reyndjers", Angliya), Ognen Vukoevich ("Dinamo", Ukraina), Ivan Perishich ("Volfsburg", Germaniya), Mateo Kovachich ("Inter", Italiya), Milan Badel, Ivo Ilichevich (ikkisi- "Gamburg", Germaniya), Marselo Brozovich ("Dinamo", Xorvatiya), Ivan Mochinich ("Rieka", Xorvatiya), Mario Pashalich ("Xayduk", Xorvatiya), Sammir ("Xetafe", Ispaniya);

Hujumchisi - Mario Manjukich ("Bavariya", Germaniya), Ivica Olich ("Volfsburg", Germaniya), Eduardo da Silva ("SHaxtyor", Ukraina), Nikica Elavich ("Xall Siti", Angliya), Ante Rebich ("Fiorentina", Italiya), Duye CHop ("Dinamo", Xorvatiya).

SHahboz Beg'amov