Yangibozorda “Ustozlar” va “SHogirdlar” uchrashishdi

Ochig'i, ushbu dargohda oxirgi qo'ng'iroq yangrashi arafasida murabbiy va o'qituvchilardan iborat bo'lgan hamda 9-sinf bitiruvchilaridan tashkil topgan jamoalar o'rtasida futbol uchrashuvi o'tkaziladi. Bo'lg'usi sobiq tarbiyalanuvchilarning kelgusida maktab-internati va u erda o'tgan damlarini iliq taassurotlar bilan eslab yurishlari va ustozlariga hurmat-ehtirom ramzi sifatida o'tkazilayotgan bu tadbir o'ziga xosligi bilan ajralib turadi.

Yangibozor tumani xokimligi, prokuraturasi va mazkur talim muassasasi hamkorligida tuman o'yingohida uyushtirilgan navbatdagi uchrashuv ham har galgidek juda qiziqarli o'tdi. Unda “Ustozlar” ham, “SHogirdlar” ham munosib o'yin namoyish qilishdi. Bilim maskanini tugatayotgan yoshlar har qancha urinishmasin, “Ustozlar”iga bas kela bilishmadi. Natijada, ular 1:2 hisobida imkoniyatni boy berishdi.

Uchrashuv yakunlangach, ikkala jamoa  markaziy minbar oldiga saf tortishdi. 9-son futbol bo'yicha ixtisoslashtirilgan davlat maktab-internati direktori Xamrobek Bektemirov, Xorazm viloyati futbol federaciyasi birinchi vice prezidenti Ravshan Otajonov, “Xorazm” jamoasi bosh murabbiyi Vali Sultonovlar ushbu o'yinning yoshlar hayotidagi ahamiyati va mohiyati haqida to'xtalishib, bitiruvchilarning keyingi o'qishlarida omadlar tilashdi.

Ikrom  XUDOYBERGANOV.