"Xorvatiyalik Messi" - Alen Halilovich hozir qaerda?

BAA yashil maydonlarida o'tkazilgan 2013 yilgi kichik mundial (17 yoshgacha bo'lgan o'smirlar o'rtasidagi) yodingizdami?

Dilshod Nuraliev boshchiligidagi terma jamoamiz o'sha musobaqaning guruh bosqichida Marokash, Xorvatiya hamda Panama termalariga qarshi kurashgan. O'smirlarimiz 3-turda Xorvatiya termasini 2:1 hisobida taslim qilishgan edi. O'sha bahsda xorvatlarning yagona goliga mualliflik qilgan Alen Halilovich ko'plab ekspertlar tomonidan jahon futbolining bo'lajak yulduzi sifatida etirof qilingan.

10-raqamda to'p tepadigan chapaqay o'yinchi "yangi Messi", "xorvat Messisi" singari laqablarni olganida endigi 17 yoshga qadam qo'ygan edi. "Dinamo" (Zagreb)ning umidli vakili kelasi yil "Barselona"ga transfer qilindi. O'shanda katalon klubi 18 yoshli Alen uchun 5 mln evro to'lagan. Biroq, Halilovichning yoshi ulg'aygan sari darajasi tushib bordi. "Ko'k-anorranglilar" tarkibida o'z o'rnini topomagach, Bundesligaga ko'chib o'tdi. "Gamburg"dagi omadsiz 2 yildan keyin "Milan"ga keldi. "Rossonerilar" tarkibida 1,5 yil harakat qilib "kesakdan olov chiqarolmagan" yarim himoyachi CHempionshipga ko'chib o'tdi.

U bugungi kunda "Birmingem Siti" jamoasi sharafini himoya qilmoqda. Malumot uchun, CHempionshipning o'tgan mavsumida 784 daqiqa o'ynagan Halilovich faqat 1 marta raqiblari darvozasiga yo'l topgan. Demak, mutaxassislarning 8 yil oldingi taxminlari o'zini mutlaq oqlamadi.

"Nasaf"ga OFK kubogini olib bergan Anatoliy Demyanenko hozir qaerda?