Xorazm viloyati futbolining 2016 yil yakunlari sarhisob qilindi

Urganch shahridagi muhtasham “Nozli” to'yxonasida o'tkazilgan tantanali bayram tadbirida Xorazm viloyati hokimligi madaniyat va sport ishlari boshqarmasi, viloyat futbol federaciyasi, futbol yo'nalishidagi maktab-internat hamda sport maktablari mutassaddilari, murabbiylar, faxriylar  hamda ommaviy axborot vositalari vakillari, shuningdek, Qoraqalpog'iston Respublikasidan kelgan mehmonlar ishtirok etdi.

Quvonarlisi shunda bo'ldiki, bu galgi tadbirda Iskandar Mahmudov, SHuhrat Vaisov, Ilya Pak, Ozod Abdullaev, Erkin Qadamov, Zaripboy Abdalniyozov, O'ktam Otaev, Odamboy Qurbonniyozov, Baxtiyor  Rajabboev singari vohaning o'z davrining ko'plab taniqli sport faxriylarini uchratish mumkin edi.
Tantanada so'zga chiqqan viloyat madaniyat va sport ishlari boshqarmasi boshlig'i SH. Madaminov, viloyat futbol federaciyasi birinchi vice prezidenti R. Atajonovlar mamlakatimizda sport, xususan, futbolni rivojlantirish borasida olib borilayotgan ibratli ishlar haqida to'xtalib, tadbir ishtirokchilarini kirib kelayotgan yangi -2017 yil bilan qutlashdi. O'z navbatida, viloyatda 2016 yil yakuni bo'yicha “Eng yaxshi” deb topilgan futbolchilar, murabbiy va hakamlar, jamoalar, shuningdek,  futbolga ixtisoslashtirilgan maktab-internati hamda BO'SMlarni tegishli darajadagi diplom va tashakkurnoma bilan taqdirlashdi.
.
XORAZM VILOYATI FUTBOLINING 2016 YIL YAKUNIGA KO'RA NOMINACIYALAR BO'YICHA G'OLIBLARI

1.“Yilning eng yaxshi yosh futbolchisi”- Muhammadqodir RAHIMBERGANOV(UOZK, Urganch shahri).
2.“Yilning eng yaxshi iqtidorli futbolchisi”- Ruslan RAHIMOV(SO'EAIBO'SM, Urganch shahri).
3.“Yilning eng yaxshi futbolchisi” – Bobur RAHIMBERGANOV(“Yoshlik”, Urganch shahri).
 4.“Oliy liga jamoalarida o'ynayotgan yilning eng yaxshi xorazmlik futbolchisi”- Jaloladdin MASHARIPOV(“Paxtakor”, Toshkent).
5.“Yilning eng yaxshi faxriy futbolchisi”- Otabek RAHIMOV(“Xorazm”,Urganch).
6.“Yilning eng yaxshi yoshlar murabbiyi”- Alisher RO'ZMETOV (sport o'yinlari va engil atletikaga ixtisoslashtirilgan BO'SM).
7.“Yilning eng yaxshi murabbiyi”- ALIMARDON ROZIKOV (UOZK, Urganch shahri).
8.“Yilning eng yaxshi hakami”- Dilshod JUMANIYOZOV (Xiva shahri).
 9.“Yilning eng yaxshi yoshlar jamoasi” - 2004 YILDA TUG'ILGAN BOLALAR TERMA JAMOASI (Sport o'yinlari va engil atletikaga ixtisoslashtirilgan BO'SM).
10.“Yilning eng yaxshi jamoasi”- UOZK(URGANCH OLIMPIYA ZAXIRALARI KOLLEJI) jamoasi.
11.“Yilning eng yaxshi mini futbol jamoasi”- “JAYHUN” jamoasi (Urganch shahri).
12.“Yilning eng yaxshi bolalar va o'smirlar sport maktabi” -  SO'EAIBO'SM (SPORT O'YINLARI VA ENGIL ATLETIKAGA IXTISOSLASHTIRILGAN BO'SM) jamoasi.
13.“Yilning eng yaxshi futbol maktab internati”- URGANCH SHAHAR 5-SON FUTBOL MAKTAB INTERNATI.

SHuningdek, Urganch shahridan Jamoladdin Abdullaev, Mamur Hojiev, Sanat Rajapov, Umid Rahimov, Abror Qilichev, SHerzod Ibodullaev, Pitnak shahridan Artyom To'raev, Yangibozor tumanidan Umid Jumamurotov, Bog'ot tumanidan Beknazar Tojimovlar Xorazm viloyati hokimligi Madaniyat va sport ishlari boshqarmasi va viloyat futbol federaciyasining TASHAKKURNOMAsiga loyiq ko'rildi.

- Har yili eng yaxshi ko'rsatkichga erishgan vohamiz futboli ahlini va jamoalarni taqdirlashni ananaga aylantirganmiz, - deydi Xorazm viloyati futbol federaciyasi birinchi vice-prezidenti Ravshan Atajonov. – Tadbirni tashkil etishdan asosiy maqsad, futbolimiz rivojiga foyda keltirayotgan insonlar hurmatini bajo keltirish, buning barobarida, ularni yangi marralar sari talpintirishdan iboratdir. Say-harakatlarimiz esa besamar qolmay, ijobiy natijasini bermoqda. Binobarin, murabbiylarimizdan tortib, futbolchilarimizgacha chiroyli futbol namoyish etishga intilib, muxlislarimizni quvontirishyapti. Zero, futbol – bu xalq o'yinidir.

- Bugun bolalar va o'smirlar sport maktabimiz hayotida juda quvonchli kun,-  deydi viloyat madaniyat va sport ishlari boshqarmasiga qarashli SO'EAIBO'SM direktori J. Abdullaev.- Zero, joriy yilgi taqdirlash marosimi kayfiyatimizni ko'tarib yubordi. Negaki, besh nominaciya bo'yicha g'oliblik aynan sport maktabimiz vakillariga nasib etdi. Bundan qanchalar faxrlansak arziydi. Nasib qilsa, 2017 yili yanada yuksak ko'rsatkichlar uchun harakat qilamiz.

Ikrom  XUDOYBERGANOV.