"Vodiy futboli". SHerzod Hakimov uylanmoqda. “Navbahor” bugun yig'iladi

“Neftchi”: SHerzod Hakimov uylanmoqda

Farg'onaliklar kelayotgan yakshanba kuni o'z maydonida “Olmaliq”ni qabul qiladi. Bo'lajak bahsga jamoa jiddiy tayyorgarlik ko'rmoqda. 8 iyun kuni hujumchi SHerzod Hakimovning nikoh to'yi. Unga futbolchilar munosib sovg'a sifatida navbatdagi turda g'alaba taqdim etmoqchi. “Olmaliq” bilan o'yinlarning boshlanish vaqti malum bo'ldi. Unga ko'ra, 6 iyun kuni Qirgulidagi “Neftchi SK” stadionida kechadigan “Neftchi” – “Olmaliq” yoshlari o'rtasidagi bahs 17:30da start olsa, 7 iyun kuni oliy liga doirasidagi bahs “Istiqlol” stadionida soat 18:00da boshlanadi. 

“Navbahor”: Jamoa bugun yig'iladi

Rejaga ko'ra futbolchilar ayni paytda klub qarorgohiga etib kelmoqda. O'tgan turda maydonga tushmagan Azam Aliev, Dilshod Jabborov va yana yoshlar jamoasidagi bir qator futbolchilar kecha yordamchi murabbiylar boshchiligida mashg'ulot o'tkazishdi. Bugundan Baxtiyor Ashurmatov mashg'ulotlarga o'zi boshchilik qiladi. “Navbahor”ning ham navbatdagi o'yinini boshlanish vaqtlari malum bo'lib ulgurdi. Klub matbuot xizmatining aytishicha, 5 iyun kuni yoshlar ligasining 12-turidan o'rin olgan “Navbahor” – “Buxoro” uchrashuvi To'raqo'rg'ondagi “Yoshlik” stadionida soat 17:00da boshlanadi. Oliy liga o'yini esa 6 iyun kuni Namangan shahridagi “Markaziy” stadionda 18:00da start oladi. 

“Qo'qon-1912”: “Metallurg” bilan o'yinga astoydil tayyorgarlik ko'rilmoqda

Qo'qonliklar navbatdagi turni safarda aniqrog'i, Bekobodda “Metallurg”ga qarshi o'tkazadi. Bo'lajak bahsga jamoa azolari puxta tayyorgarlik ko'rmoqda. Tarkibda aytarli yo'qotishlar yo'q. “Metallurg” yoshlariga qarshi bahs 5 iyun kuni “Anoxin” nomli stadionda 17:30da boshlansa, 6 iyun kuni esa oliy liga uchrashuvi “Markaziy” stadionida 18:00da boshlanishi rejalashtirilgan. 

“Andijon”: Asror Rahmonov “So'g'diyona”ga qarshi bahsni o'tkazib yuboradi

O'tgan turda “Neftchi” bilan o'yinda hakam tomonidan ikkinchi marotaba sariq kartochka bilan ogohlantirib, maydonni sheriklaridan oldin tark etishga majbur bo'lgan Asror Rahmonov endi diskvalifikaciya tufayli navbatdagi bahsni o'tkazib yuborishga majbur. Eslatib o'tamiz, andijonliklar mazkur turni 6 iyun shanba kuni safarda “So'g'diyona”ga qarshi o'tkazadi.