Vadim Abramov: "Yirik g'alabalarda hech qanday sir yo'q"

"Bugungi yirik hisobdagi g'alabadan xursandman. Maqsadimiz har bir o'yinda maydonga tushib g'alaba qozonishdan iborat. Yirik g'alabalarda hech qanday sir yo'q. SHunchaki davralar oralig'ida biz jamoaga kerakli bo'lgan futbolchilarni olib keldik. Aynan shu bois yirik g'alabalar qo'lga kiritilmoqda".

"Geynrix, Rahmatullaev kabi futbolchilar jamoaga qo'shilgach o'yin uslubimiz ancha o'zgardi. Endi pas bera oladigan va gol ura oladigan futbolchilar ko'paydi".

"Bugun Farhod Tojiev bitta emas uchta qulay imkoniyatlardan foydalana olmadi. Baribir ikki to'p kiritganidan xursandman. Ivan Nagaevda esa o'ziga xos pasayish kuzatilmoqda. Ammo uning yoshida normal holat, hali u o'ziga keladi va bundan ham yaxshiroq o'ynab ketadi, bunga ishonaman".

"Osiyo o'yinlarda klubimizdan bir qator futbolchilar ishtirok etishadi. Bundan albatta xursandman, sababi ular vatan shanini himoya qilishadi. O'zbekiston terma jamoasiga ushbu musobaqada eng yuqori o'rinlarni qo'lga kiritishini tilab qolaman".

"Yaqinda mustaqillik bayrami keng nishonlanadi. Istiqlol tufayli yurtimizda futbol jadallik bilan rivojlandi. Mana oddiy misol, qarang nechta yangi stadionlar qurildi, qurilmoqda. Bularning bari aynan mustaqillik sharofati bilan bo'lmoqda".

"Hozircha bizda va "Paxtakor"da boshqalarga qaraganda chempionlik uchun imkoniyat ko'proq. Biroq bir qator chempionatlarda mavsum o'rtasida birinchi o'rinda borib turib yakunda chempion bo'la olmaganlarni siz ham biz ham ko'rganmiz. SHu bois mavsum tugashini kutaylik", - deydi Vadim Abramov.