Vadim Abramov: "Ertaga tarkibda o'zgarishlar bo'ladi"

- Ertaga birinchi o'yin bilan solishtirganda tarkibda o'zgarishlar bo'ladimi?
- Ha, albatta. Ertangi bahsda bazi o'zgarishlar bo'ladi. "Lokomotiv" hali OCHLda g'alaba nashidasini surmagan va biz ilk g'alabani qo'lga kiritishni istaymiz.

- Darvozabon borasida qaror qabul qilib bo'ldingizmi?
- Ha, bu borada yakuniy to'xtamga keldim.

- Jamoa ertangi muhim o'yinga tayyormi? Yo'qotishlar yo'qmi?
- Jamoa o'yinga tayyor. Barcha futbolchilar maydonga tushishga shay holatdalar.

- "Fulad" to'qqiz o'yindan buyon OCHLda mag'lubiyatsiz o'ynab kelmoqda. Ertaga "Lokomotiv" ushbu seriyaga chek qo'ya oladimi?
- Rahmat, bu malumot haqida bilmasdik. Biz ham hali OCHLda g'alaba qozona olganimiz yo'q. Ertaga shu ananalarni buzishga harakat qilamiz.

- "Fulad" bilan bo'ladigan o'yinda siz uchun eng muhimi nima?
- Eng asosiysi birinchi bo'lib gol urib olishimiz kerak. "Lokomotiv" tezroq o'zining ilk g'alabasini nishonlashi kerak.

- Fozil Musaev hozirda Eron chempionatida to'p surmoqda. "Fulad" jamoasi haqida undan malumot olishga urinib ko'rdingizmi?

- Hozirgi zamonda u bilan bemalol telefonlashib, bog'lanishimiz mumkin. Lekin men Fozil Musaev "Fulad" jamoasi haqida bizdan ko'proq malumotga ega deya olmayman. U shunchaki "Fulad" jamoasi geografik joylashuvi haqida bilishi mumkin. SHu bois unga sim qoqib, nimanidir bilishga oshiqmadik. Agarda u "Fulad"da o'ynaganida ham biror narsani so'rasak bo'lardi.

Temur Kapadze: Eron jamoalari deyarli bir xil o'ynashadi. Ular jismonan ancha kuchli raqib hisoblanishadi. Birinchi o'yinda yo'l qo'yilgan xato va kamchiliklarni takrorlamaslikka harakat qilamiz. "Al Hilol" bilan bo'lgan o'yindagi mag'lubiyatni unutganmiz va bor diqqat-etibor "Fulad" bilan bo'ladigan o'yinga qaratilgan. Umid qilamanki, ertaga muxlislarga g'alabani taqdim etamiz.