Ummon etakchisi – Ali Al Habsi

Ayni paytda Angliyaning “Uigan” klubi sharafini himoya qilayotgan Al Habsi terma jamoa sardori hisoblanadi.

1981 yilda tug'ilgan Ali Al Habsi shu paytgacha terma safida 92ta o'yinda maydonga tushib, bu borada o'ziga xos rekord o'rnatgan. U ikkita Osiyo Kubogida qatnashgan darvozabon hisoblanadi.



Klublardagi faoliyat
2002-2003 yilda Ummonning “Al Nasr” klubida faoliyat olib borgan Al Habsi bir yildan so'ng Norvegiyaga yo'l oldi va Osloning “Lin” jamoasi sharafini uch yil davomida himoya qildi. SHunday qilib u Ummondan Evropaga yo'l olgan birinchi futbolchi bo'ldi. 2004 yilgi mavsumda esa u Norvegiya chempionatining “Eng yaxshi darvozaboni” deb topildi.

2006 yil “Bolton”ga ko'chib o'tgan Al Habsi bir yil umuman maydonga tushmadi. Faqat 2007 yilga kelibgina Liga Kubogida “Fulxem”ga qarshi maydonga tushdi. 2007-2008 yilgi mavsumda ummonlik darvozabon “Bolton” safida 15 marta maydonga tushib, UEFA Kubogida hatto “Bavariya”ga qarshi darvozani qo'riqlashga muvaffaq bo'ldi. Natijada klub rahbariyati u bilan shartnomani 2013 yilgacha uzaytirishni maqul ko'rdi. Ammo jarohat olgan Yussi Yaaskelaynen davolnib safga qaytgach, Al Habsi raqobat tufayli o'z joyini bo'shatib berishga majbur bo'ldi.

2010 yil klub rahbariyati darvozabon o'yin amaliyotisiz qolib ketmasligi uchun bir yil muddatga “Uigan”ga ijaraga berishni maqul ko'rdi. Ali Al Habsi “Uigan”ga kelgach, tezda ishi rivojlanib ketdi. U penaltilarni qaytarish bo'yicha Angliya chempionatining eng yaxshi darvozabonlaridan biriga aylandi. Xususan, Robin van Persi, Karlos Teves, CHicharito, Mikel Arteta tomonidan berilgan 11 metrlik jarima to'plarini qaytarishga muvaffaq bo'ldi. SHu-shu osiyolik mahoratli darvozabon “Uigan” darvozasini qo'riqlab kelmoqda.



Terma jamoadagi faoliyat
Ali Al Habsi 17 yoshidan beri Ummon terma jamoasi azosi hisoblanadi. Aslida unga o'shandayoq Evropadan taklif tushgan, biroq hali yosh bo'lgani uchun chetga chiqishga ruxsat tegmagandi. 2004 yil Xitoyda o'tkazilgan Osiyo chempionatida Al Habsi Ummonning birinchi raqamli darvozaboni sifatida guruh o'yinlarining hammasida ishtirok etdi.

Keyin JCH-2006 saralash bahslarida ishtirok etdi va 2007 yil bo'lib o'tgan Osiyo chempionatida ham terma darvozasini qo'riqladi.
Bundan tashqari, Al Habsi Ko'rfaz Kubogida ketma-ket to'rt marta qatnashgan darvozabon hisoblanadi. Qolaversa, 2009 yilgi musobaqada g'olib chiqqan. 



SHaxsiy hayoti va yutuqlari
Ali Al Habsi barcha ummonliklar kabi islom diniga amal qiladi va o'zini juda dindor deb hisoblaydi. U oilali va bir nafar Ranad ismli qizchasi bor. Bilasizmi, o'rta maktabni tugatgach, Al Habsi malum muddat Muskatdagi xalqaro aeroportda o't uchiruvchi bo'lib ishlagan. Bir gal “Al Jazira Sports”ga bergan intervyusida “Agar futbolni tanlamaganimda hozir ham o't uchiruvchi bo'lib ishlayotgan bo'lardim” degandi.

Ali Al Habsi futbolchilik faoliyati davomida shu paytgacha bir qator sovrinlarni qo'lga kiritgan.

2012-13 yilgi mavsumda “Uigan” safida Angliya Kubogi sohibi
2009 yilgi Ko'rfaz Kubogi sohibi
Ko'rfaz Kubogining eng yaxshi darvozaboni - 2003, 2004, 2007, 2009, 2011
2004 yilning “Eng yaxshi arab darvozaboni”
Norvegiya chempionatining “Eng yaxshi darvozaboni” - 2004 yil
“Uigan” futbol klubining “Eng yaxshi o'yinchisi” - 2011 yil

X.Xoliqov.