Umid Ahmadjonov Qatar va Gollandiyada muzokaralar olib borish uchun jo'nab ketdi

U erda Umid Ahmadjonov dunyodagi eng yaxshi futbol akademiyalaridan biri sanalgan “Aspire”ga tashrif buyuradi. Xabaringiz bor, Umid Ahmadjonov o'tgan yilning 16 oktyabr kuni “Aspire” akademiyasiga tashrif buyurgan edi. Bu safar tashrifdan ko'zlangan asosiy maqsad, yurtimizda barpo qilinayotgan bolalar va o'smirlar futbol akademiyalariga Qatardan mutaxassislarni jalb qilishdan iborat.

SHuningdek, rejaga ko'ra O'FA birinchi vice-prezidenti JCH—2022 tashkiliy qo'mitasi rahbariyati bilan ham ko'rishib, JCHga tayyorgarlik bo'yicha olib borilayotgan chora-tadbirlar bilan yaqindan tanishadi.

“Biz hozirdanoq 2022 yilgi jahon chempionati uchun poydevor qo'yib borishimiz kerak. Asosiy maqsad Qatardagi jahon chempionatiga yo'llanma olish ekan, bu yo'lda tinmay mehnat qilishimiz va eng asosiysi xalqaro aloqalarni mustahkamlab borishimiz lozim. SHu boisdan Qatarga amalga oshirayotgan tashrifimiz har tomonlama unumli va samarali bo'lishidan umidvorman”- dedi Umid Ahmadjonov MOQ matbuot xizmatiga.

Dohaga tashrifi davomida Umid Ahmadjonov shuningdek, 19 may kuni «Al Duhayl» hamda «Al Rayyan» jamoalari o'rtasida bo'lib o'tadigan Qatar amiri kubogining final uchrashuvini stadionning martabali mehmonlar lojasidan tomosha qiladi.

Qatardagi safar yakuniga etgach, Umid Ahmadjonov Gollandiyaning Amsterdam shahriga yo'l olishi rejalashtirilgan. U erda dunyodagi eng kuchli akademiyalardan yana biri bo'lgan "Ayaks" futbol klubi akademiyasini ko'zdan kechirib, u erda olib borilayotgan ishlar bilan yaqindan tanishishi rejalashtirilgan. Bundan tashqari, "Ayaks" futbol klubi rahbariyati bilan uchrashuv tashkil qiliniib, o'zaro hamkorlik qilish, gollandiyalik mutaxassislarni yurtimizga jalb qilish masalalari bo'yicha muzokaralar o'tkaziladi.

SHuningdek, Amsterdamda Gollandiya Qirolligi futbol uyushmasi prezidenti bilan ham uchrashuv bo'lib o'tadi. Uchrashuvda o'zbekistonlik yosh futbolchilarni Gollandiyaning kuchli klublariga jalb qilish, shu orqali futbolchilarimizning Evropaga chiqishiga yo'l ochish, Milliy terma jamoalarimizga Evropa futbolida chiniqqan kuchli nomzodlarni tayyorlash masalalari muhokama qilinadi.