Ulug'bek Hoshimov: "Neftchi"da kam gol urayotganim o'zimni ham xavotirga solmoqda"

"Neftchi"dan taklif qilingan hujumchi Ulug'bek Hoshimov ham terma jamoa tarkibiga jalb qilingan. O'tgan mavsumlarda "Paxtakor" o'rinbosarlar jamoasida ko'plab gollari bilan ko'pchilikning etiborini tortgan futbolchining farg'onaliklar safida kutilgan o'yinni ko'rsata olmayapti (statistika 12ta o'yin 1ta gol, 1ta pas). Biz bu borada uning fikrlari bilan qiziqdik. 

"Yig'in yaxshi o'tmoqda. Maqsadimiz Quvaytdagi musobaqada guruhda birinchi o'rinni egallash. Garchi keyingi yil musobaqa O'zbekistonda bo'lsada, o'zimiz ishtirok etadigan har qanday turnirda vatanimiz bayrog'ini balandga ko'tarishni istaymiz. "Neftchi"ga moslashib olishda qiyinchilik bo'lgani yo'q. Gol ura olmayotganim o'zimni ham xavotirga solmoqda. So'nggi marotaba "Yangier"ga gol urganimdan so'ng boshqa darvozalarga to'p kiritmadim. Tushkunlikka tushmasdan ishlashda davom etishim kerak. Buni ko'p o'ylasam o'zimga zarar bo'lishi mumkin. Qaytaniga to'sqinlik qiladi. Faqat mehnat qilishdan, ishlashdan to'xtamasligim kerak. 

"Neftchi" Superligaga chiqsa kurasha oladimi? Biz hali elitada emasmiz. Murabbyilarimiz har bir o'yinni yutishimiz kerakligini aytishmoqda. Klubni o'z darajasiga qaytarishimiz lozim. Mavsumni birinchi o'rinda yakunlash uchun qo'limizdan kelgancha harakat qilamiz. Superligada bemalol kurasha olamiz, deb baralla ayta olaman",- deydi Ulug'bek Hoshimov.