U-23 Osiyo chempionati. Ravshan Haydarov OFK saytiga intervyu berdi

Ayni paytda O'zbekiston U-23 terma jamoasi Xitoyning Guangjou shahrida bo'lib turibdi va guruh o'yinlariga tayyorgarlikni davom ettirmoqda. Futbolchilarimiz 9 yanvar kuni Qatarga qarshi o'yin bilan Osiyo chempionatini boshlashadi. Esingizda bo'lsa, iyulda bo'lib o'tgan saralash bosqichi biz uchun omadli kelib, vakillarimiz har uchala raqib - Livan, Nepal va BAAni mag'lub etgan holda birinchi o'rin bilan musobaqa yo'llanmasini qo'lga kiritishgandi.

Endilikda hammamiz shu yigitlardan chempionatda ham ijobiy natija kutmoqdamiz. Jamoa bosh murabbiyi Ravshan Haydarov musobaqa oldidan OFK rasmiy saytiga intervyu berib, quyidagi fikrlarni bildirdi:

- "Saralashdagi muvaffaqiyatni musobaqaning final bosqichida ham davom ettirishni xohlaymiz. Bizning maqsad faqat ijobiy natija bilan uyga qaytishdir. Saralashdan beri jamoa ancha o'sdi va buni o'yinlar orqali ko'rsatmoqchimiz".

Malumki, ikki yil avvalgi musobaqani O'zbekiston ikkita mag'lubiyat bilan boshlagan. Qatarda o'tgan aynan shu musobaqada Qatar yakunda to'rtinchi o'rinni olgan. Ravshan Haydarov masalaning shu jihatiga ham etibor qaratdi:

- "Birinchi o'yin har doim muhim bo'lib kelgan. Qatar o'ziga yarasha shakllangan jamoa, lekin biz ham qarab turmaymiz. O'ylaymanki, bu o'yinda g'alaba biz tomonda bo'ladi. Murabbiy sifatida ushbu musobaqada g'olib chiqa olishimizni sezyapman va buning uchun bor kuchni ishga solamiz".