U-16 Osiyo chempionati. Tojikiston finalni ko'zlamoqda

Ertaga musobaqaning yarim final uchrashuvlari o'tkaziladi. Kelasi yil Peruda bo'lib o'tadigan U-17 jahon chempionati yo'llanmasini qo'lga kiriotgan Tojikiston o'smirlar terma jamoasi ertaga yarim finalda Janubiy Koreyaga qarshi o'ynaydi. Uchrashuv bizning vaqt bilan 18:00da start oladi.

Jamoa darvozaboni Muxriddin Hasanov OFK saytiga bergan intervyusida o'z tengdoshlari bilan finalni ko'zlayotgani haqida gapirib berdi. Malumki, yon qo'shnilarimiz chorak finalda KXDRga qarshi bahs olib borib, o'yinda 1:1 hisobida qayd etildi. Penaltilar seriyasida esa omad tojiklarga kulib boqdi. Muxriddin Hasanov penaltilar seriyasida ikkita to'pni qaytarishga muvaffaq bo'ldi.

"Biz g'alabadan xursandmiz, lekin xotirjamlikka berilishimiz kerak emas. Men Tojikiston terma jamoasida o'ynashdan nihoyatda baxtiyorman. Penaltilar seriyasida ham yutish oson emas. Men o'zimga to'liq ishongandim. O'yindan bir kun oldin mashg'ulotda biz 15 daqiqacha faqat penaltilar ustida ishladik. Murabbiyim Asad Norov hushtak chalinmaguncha sakrama dedi, men ham shunga amal qildim. Endi bor etiborni yarim finalga qaratamiz. Maqsadimiz esa finalga chiqish", - deydi yosh darvozabon.

Malumot uchun, Tojikiston o'smirlar termasi bungacha ikki bor U-16 Osiyo chempionatida qatnashgan bo'lib, ikkalasida ham jahon chempionati yo'llanmasini qo'lga kiritgan. Tojikiston 2006 yil birinchi bor Osiyo chempionatida ishtirok etgan va 3-o'rin uchun kechgan bahsda Suriyani mag'lub etgan. Ikkinchi ishtirok oradan ikki yil o'tib ro'y bergan va bunda tojikistonlik o'smirlar chorak finalda KXDRdan ustun kelishgan. Taqdirni qarangki, uchinchi ishtirok ham muvaffaqiyatli kelib Tojikiston U-16 jamoasi yana KXDRni mag'lub etgan holda jahon chempionati yo'llanmasini qo'lga kiritdi.

U-16 Osiyo chempionati-2018. Malayziya

1/2 final. 4 oktyabr

18:00. Tojikiston - J.Koreya
13:30. Yaponiya - Avstraliya