"Toshkentlik Modrich" bilan tanishamiz

O'sha erda "Odil Junior"ning sarg'ishdan kelgan hujumchisi etiborimni tortgan. Yonimda kimdir: "7-raqamni oyoqlari ham, og'zi ham tinmaskan", — degandi. Rostan ham jamoasi hujum qilayotganda tinmay bo'sh hududga ochilar, to'p yo'qotilishi bilan tinimsiz ravishda kimgadir etiroz bildirardi...

Bir oydan keyin Server Jeparov boshchiligidagi O'zbekiston U-15 terma jamoasi Dubayda BAA bilan o'ynadi. Arablar darvozasiga uchchala golimizni ham o'sha bola urdi. G'alaba qozondik...

2022 yilning 7 oktyabri. 17 yoshgacha bo'lgan o'smirlar o'rtasida o'tadigan Osiyo kubogi saralashining muhim o'yiniga "Jar" stadioni mezbonlik qilyapti. Raqib biz uchun har doim noqulay bo'lib kelgan Janubiy Koreya terma jamoasi. Hisobda ortdamiz. Uchrashuv tugashiga 10 daqiqa qolganda jarima zarbasi belgilandi. To'p yoniga yana o'sha bola keldi va xotirjamlik bilan Odil Ahmedov tomonidan Singapur, Xitoy va Ummon darvozasiga urilgan gollarning egizagini takrorladi. O'zbekiston Osiyo kubogiga boradi!

U 2006 yil Toshkent shahrida tug'ilgan ekan. Krishtianu Ronaldu sabab to'pga mehr qo'ygan bolakay 7 yoshida futbol sir-asrorlarini o'rganishni boshladi. Jarohat tufayli bir muddat tanaffus qilib, 2019 yilda Odil Ahmedov FA orqali yashil maydonga qaytdi (Dilshod Abdullaevning otasi sabab) va o'sha kundan beri hammasi yaxshi ketyapti. Dastlab, liderlik sifati va harakatchanligi tufayli maydon markaziga ko'chirilgan futbolchi bugungi kunda terma jamoamizning haqiqiy "motor"i hisoblanadi. Buni boshqalardan oldinroq payqagan "Lokomotiv" rahbariyati bir necha kun oldin 16 yoshli qahramonimiz bilan professional shartnoma imzoladi. 

Suratdagi bolakayni ko'pchilik bilmasa kerak. Eslab qoling: Lazizbek Mirzaev. May oyida uni butun Osiyo taniydi...