Tonali "Milan" timsoli bo'lishi kerak edi, lekin 80 mln evro...

Tonali bolaligidan "Milan" muxlisi edi: "Klubga bo'lgan bu jo'shqin muhabbat otamdan meros. Gattuzo kumirim edi. Men butun umrim davomida aynan "Milan" safiga qo'shilish uchun harakat qilganman".

Tonalining buvisi nabirasining bolalikdagi xatini saqlab qo'ygan. Unda Sandro "Milan" formasi komplektini olib berishni iltimos qilgan. 

U boshqa jamoalar bilan muzokara o'tkazishni ham istamagan va ularga keskin rad javobini bergan. Vaholanki, o'shanda yarim himoyachini Konte "Inter"ga olib ketmoqchi, "Yuventus" va "Barsa" ham o'z tarkibiga qo'shib olmoqchi bo'lgandi. "Milan" esa nisbatan kamtarroq shartlar bilan shartnoma taklif qilgan va futbolchi aynan "rossoneri"ni tanalagan. Oradan ikki yilcha o'tib, Tonali "Milan"da qolish uchungina maoshi kamayishiga rozi bo'ldi. 

U shunchaki jamoada to'p tepayotganidan baxtli edi va hech qanday ortiqcha shartlar qo'ymasdi. Bir necha mavsumdayoq jamoa etakchisi va vice-kapitaniga aylandi. Oxirgi ikki mavsumdan hammadan ko'proq daqiqani maydonda o'tkazdi – aynan shu oraliqda "Milan" chempionlikni qo'lga kiritdi va ECHL yarim finaligacha etib bordi. 

Tonali "Milan" timosliga, qayta oyoqqa turayotgan klubning yuziga aylanayotgandi. Biroq klubga hozir etakchilar, sodiq va kuchli futbolchilardan ko'ra, pullar ko'proq kerak bo'lmoqda. Italiyaning ko'plab mashhur nashrlarining yozishicha, Tonali sotilayotganini oxirgilardan bo'lib bilgan. Klub hattoki Sandro "Nyukasl" bilan shartnoma imzolashi uchun unga "engil bosim" o'tkazgan. 

Biz seni qadrlaymiz, Sandro, va barchasi uchun rahmat. Ammo, bilasanmi, 80 million pul ko'chada yotmaydi.. 

Afsus, zamonaviy futbolda, bevosita Italiya futbolida vaziyat shunaqaroq. Mamlakat chempionligini qo'lga kiritgan, ECHLda yarim finalgacha etib borgan jamoa moliyaviy muammolari tufayli istalgan futbolchisini sotishi mumkin. Axir superklub bunday yo'l bilan qurilmaydi-ku?

Nozima To'xtamirzaeva tayyorladi