Tohir Kopadze: "Farg'onaga g'alaba bilan qaytishimiz ham mumkin edi"

 - Bugun o'yinda jangovor durang qayd etildi, - deya so'z boshladi Tohir Kopadze. - Navoiyga faqat g'alaba ilinjida kelgandik. Uchrashuv davomida jamoamiz bir qator golli vaziyatlarni yuzaga keltirishdi. Biroq imkoniyatdan unumli foydalanishda yigitlarimizga omad kulib boqmadi.

Agar ikkinchi bo'limda Muhsinjon Ubaydullaev maydondan chetlatilmaganda, balki bugun uyga g'alaba bilan qaytgan bo'larmidik?!  SHunga qaramay, safarda bir ochkoni qo'lga kiritganimizdan xursandmiz.

Mehmondagi o'yinlarda asosan bir hujumchi bilan o'ynashga harakat qilamiz. SHu bois, SHerzod Hakimovni zaxiradan maydonga tushirdik.

"Qizilqum" ancha shakllangan, yaxshi saviyadagi legionerlarga ega jamoa. Navoiyda ularga qarshi o'ynash har qanday jamoaga qiyinchilik tug'dirishi tabiiy. O'z muxlislari qarshisida to'p surganda har qanday jamoada qo'shimcha kuch paydo bo'ladi. Bugun jiddiy raqibga qarshi  nafaqat darvozabonimiz, balki butun jamoa chiroyli futbol namoyish etdi.  O'z navbatida olis Farg'onadan bizni qo'llab-quvvatlash uchun Navoiyga tashrif buyurgan ishqibozlarimizga rahmat aytaman.