Terma jamoamizning o'yinoldi mashg'uloti

Xabaringiz bor, Olmaliqda o'tkazilgan birinchi uchrashuvda terma jamoamiz 0:1 hisobida imkoniyatni boy berdi. SHunday ekan, muxlislar xursand bo'lishi uchun bugun g'alaba qozonmasak bo'lmaydi.

Navbatdagi bahsda terma jamoamiz o'zining kuchli tarkibi bilan to'p surishi kutilmoqda. Kecha “Jar” stadioniga borib, futbolchilarning o'yinoldi mashg'ulotini kuzatdik.Aytish mumkinki, barchaning kayfiyati yuqori va hamma o'yinga shay. Jarohat tufayli bugun Sanjar Tursunov maydonga tusha olmaydi. Lekin qolgan futbolchilar bahsga tayyor.

Kechagi mashg'ulotda birgina Tursunovni hisobga olmaganda qolgan hamma qatnashdi. Olmaliqdagi o'yinda asosiy tarkibda harakat qilgan futbolchilar kecha alohida chigalyozdi mashqlarini bajarishdi. Ular to'p bilan deyarli ishlashmadi hisob. Qolgan futbolchilar bilan esa mashg'ulotni bosh murabbiy Mirjalol Qosimovning o'zi o'tkazdi. Aytgancha, kechagi mashg'ulotda yordamchi murabbiy Baxtiyor Ashurmatov ko'rinmadi. Bizga malum bo'lishicha, Ashurmatov hozir “Barkamol avlod” sport musobaqalarining ochilish marosimi tufayli Namanganda bo'lib turibdi.

Terma jamoamizning o'yindan oldingi mashg'uloti bir soat davom etdi. Mashg'ulot odatdagidek engil mashqlar bilan boshlandi. Futbolchilar dastlab “kvadrat” o'ynashdi, keyin maydonnning yarmida ikkiga bo'linib futbol o'ynashdi va mashg'ulot oxirida darvoza tomon jarima zarbalarini amalga oshirishdi. Bugungi o'yinda maydonga tushishi mumkin bo'lgan futbolchilar ro'yxati:

Ignatiy Nesterov, Eldor Suyunov, Vitaliy Denisov, Viktor Karpenko, Jasur Hasanov, Maksim SHackix, Vladimir Kozak, Anzur Ismoilov, SHavkat Mullajonov, Ulug'bek Baqoev, Islom To'xtaxo'jaev, Igor Sergeev, Diyor Turopov, Fozil Musaev, Sardor Rashidov, Navro'z Olimov, Sardor Sobirxo'jaev, Odil Ahmedov, Oleg Zoteev.

X.Xoliqov.