Terma jamoamizning kechagi o'yini haqida

O'yinda hisob ochilmadi. “Sport” telekanali xodimlariga rahmat, bir ilojini topib shu uchrashuvni efirga uzatishdi. Terma jamoa haqida saytda yoki gazetada o'qish boshqa, ammo o'yinni ko'rish boshqa. CHunki o'yinni ko'rib, ustun va kamchiliklarni bilib olasiz. Umuman olganda, har bir bahs ko'plab savollarga javob beradi.

Iroqqa qarshi ikkita uchrashuv o'tkazib, ikki xil natija qayd etdik: g'alaba va durang. Gol o'tkazib yubormaganimiz esa kishini yanada xursand qildi. Biroq kechagi bellashuvni ko'rib, terma jamoamiz Osiyo chempionatiga etarli darajada tayyormi degan savol yana kun mavzusiga chiqdi. Iroqqa qarshi ikkinchi bahsda biz ham, raqib ham yorqin harakat qilgani yo'q. Balki bu o'ta muhim musobaqa oldidan futbolchilarning juda ehtiyotkorlik bilan to'p tepishgani bilan bog'liqdir.



O'yin u qadar shiddatli kechmagani uchun xavfli vaziyatlar kam kuzatildi. Darvozabon Ignatiy Nesterov o'z o'rnida ancha yaxshi harakat qildi. Himoya chizig'ida qanot himoyachilarimiz ancha faol. SHuhrat Muhammadiev ham, Vitaliy Denisov ham hujumga qo'shilishni xush ko'rishadi. Hatto birinchi taymda aynan SHuhratning faolligi evaziga raqib darvozasi tomon penalti belgilandi. Lekin markaziy himoyada muammolar etarlicha. Anzur Ismoilov bilan SHavkat Mullajonov juftligi raqib hujumchilarini birdek yopib qo'ya olishmadi.



Yarim himoya esa bizning eng kuchli chizig'imiz hisoblanadi. Jarohatdan tuzalib endi safga qaytishgani bois kechagi o'yinda Odil Ahmedov bilan Server Jeparov o'rtacha harakat qilishdi. Lekin Osiyo Kubogida ulardan kuchli o'yinni kutsak bo'ladi. Temur Kapadzening ham o'yini ancha og'irlashib qolibdi. Aziz Haydarov har holda tuzuk harakat qildi. Sardor Rashidov esa qo'rqmasdan o'zi xohlagan futbolni namoyish etaverishi kerak. Unda salohiyat bor, muhimi shu salohiyatni yuzaga chiqara bilishida.

Hujum chizig'imiz esa afsuski, biz kutganchalik kuchli emas. Vohid SHodiev maydonda 80 daqiqa nima qilganini ochig'i tushunmadim. Uning bor-yo'qligi deyarli bilinmadi. Hujumchi degani hadeb vaziyat bo'lishini kutmasdan kerak bo'lsa, o'zi vaziyat yaratishi kerak. Hozirgi yaxshi hujumchilar menga qachon to'p etib kelarkin deb bir chetda qo'l qovushtirib turishgani yo'q. Hujumchi to'pni olib qo'yish uchun harakat qilishi shart.



To'g'ri, boshqa jamoalarning qanday holatda ekanligini unchalik bilmaymiz. Lekin Saudiya Arabistonining "Ko'rfaz kubogi"da, Xitoyning esa Paragvayga qarshi ko'rsatgan o'yinlaridan kelib chiqib aytadigan bo'lsak, kechagi o'yin bilan guruhdan chiqishimiz amrimahol bo'lib qoladi. Guruhdan chiqish uchun kamida Yangi Zelandiya va BAAga qarshi qanday harakat qilgan bo'lsak, ana shunday o'ynashimizga to'g'ri keladi. Avvalo mustahkam tarzda himoyalanishni, himoyadan hujumga o'tganda tez harakat qilishni va maydonning har bir qarichida to'p uchun kurashishni o'rganishimiz lozim. SHunday o'yin ko'rsatgani uchun ham Yaponiya, Janubiy Koreya bizdan tepada turadi. Toki biz ham tez va tajovuzkor o'yinni o'rganmas ekanmiz, qita birinchiliklarida o'zimizni ko'rsata olmaymiz.

X.Xoliqov.