Tachmurod Agamurodov: “Yakunda durang natijani ushlab qola bilmadik”

Dastlab jurnalistlarning savollariga “Dinamo” jamoasi ustozi Tachmurod Agamurodov javob qaytardi.

Tachmurod Agamurodov (“Dinamo” jamoasi bosh murabbiyi): - Birinchi navbatda “Navbahor” jamoasini qo'lga kiritilgan g'alaba bilan tabriklayman. Uchrashuv haqida gap ketganida oldingi o'yinlardagi kabi biz uchun qiyin kechdi. Yakunda durang natijani saqlab qola bilmadik. Agarda voqealar rivoji bizning foydamizga ishlaganida ko'pi bilan durang qayd etishimiz mumkin edi. Biroq, mezbonlarning urgan ikkinchi gollari chog'ida biroz xushyorlikni yo'qotishimiz pand berdi. Maydonda esa keskin kurash kechdi. Har ikki jamoa futbolchilari ham ijobiy natijani qayd etish uchun borlarini berib harakat qilishdi. Futbolda kimdir yutadi, boshqasi esa mag'lubiyatga uchraydi.

- Jamoangiz o'yinda yomon ko'rinmadi. Yani futbolchilar munosib tarzda to'p surishdi. CHempionat startidagi natijalarni ijobiy ko'rinish olmaganligiga asosiy sabab nimada?
- Birinchi navbatda tarkibni shakllantirishda kechikdik. Ko'plab jamoalar tarkib borasida yanvar oyidayoq bir to'xtamga kelib ulgurishgandi. To'g'ri ular safiga ayrim o'yinchilar ham qo'shilgan. Lekin, ularning soni bir-ikki nafardan oshgani yo'q. Biz esa fevral oyiga kelibgina tarkib yig'ishni boshladik. Bunday sharoitda futbolchilarni jismoniy holatini yaxshilash bilan bir qatorda o'zaro bog'liqlikni ham shakllantirish talab etiladi.

Ixtiyorimizda mavjud bo'lgan vaqt oralig'ida raqobatga bardosh bera oladigan jamoani chempionat startiga tayyorlay olmadik. Turdan-turga jamoamiz o'yini kuchayib bormoqda. Afsuski, bunday holat bizga qulaylik yaratib bermayapti. Yani jamoamizga oson bo'layotgani yo'q. Aynan yuqoridagi sabablar jamoamizni ikki bo'lim davomida bir maromda to'p surishi imkoniyatini bermayapti. Aksariyat uchrashuvlarning so'nggi daqiqalarida raqibga imkoniyatni boy berib qo'ymoqdamiz.