Tachmurod Agamurodov: "Men qog'ozda rasman jamoa bosh murabbiyi emasman"

Biz bugun "Paxtakor"dan ijaraga olingan futbolchilardan foydalana olmasdik. Sababi, klublar o'rtasida shunday kelishuv bor edi. SHu bois, bu o'yinda yoshlarni sinab olishga qaror qilgandik. Uchrashuv qiyin bo'ldi. Hozircha tarkibimizdagi futbolchilarning darajasi jiddiy raqibga qarshi yaxshiroq o'ynashga qodir emas.
Men jamoani mavsum yakuniga ikki oy qolganida qabul qilib oldim. Uchrashuv davomida murabbiylar shtabida o'tirmaganimning sababi shundaki, men qog'ozda rasman jamoa bosh murabbiyi emasman va murabbiylar shtabida o'tirishga haqqim yo'q. Klub bilan shunday kelishuvga erishganmiz. Bu mendan chiqqan taklif.

- Sizni "Paxtakor"dan keyingi faoliyatingiz bir maromda kechmayapti. Buning sababi nimada?
- "Paxtakor"da ishlaganimdan hech kim menga qaysi futbolchini o'ynatish kerakligini aytmasdi, o'rgatmasdi. Hamma o'z ishini qilardi. Ammo boshqa jamoalarga o'tganimdan keyin shunaqangi holatlarga duch kelyapman va shu bois, bir jamoada ko'p yillar mobaynida ishlash uchun imkoniyat bo'lmayapti. Masalan, "Buxoro"dan o'zim ketishni xohlagandim.