“Surxon” lageridan daraklar

Yaqinda jamoada bosh murabbiy o'zgargani haqida xabar bergandik. Endilikda jamoa natijalariga Dilshod Nuraliev javob beradi. Bosh murabbiyga endilikda Rufat Akramxo'jaev va Ikrom Ibragimov yordam beradigan bo'ldi. Ularning safi kelgusi haftada yana bittaga ko'payishi kutilmoqda. Bugun mashg'ulotlarga katta murabbiy Akramxo'jaev boshchilik qildi. Nuraliev Toshkentdagi ayrim yumushlarini hal etib, ertadan Termizga borib, rasman ishga kirishadi.  

Tarkibda o'ttiz nafardan ziyod futbolchi shug'ullanmoqda. Mashg'ulotlar hozircha kuniga bir mahaldan o'tkazilyapti. Murabbiylarning rejasiga ko'ra, “Surxon” o'z qarorgohida ushbu haftaning so'nggiga qadar yig'in o'tkazadi. 12 fevraldan termizliklarning o'quv-yig'in mashg'ulotlari Toshkentga ko'chadi. Unga qadar murabbiylar ixtiyoridagi futbolchilar saralab olinadi. Poytaxtdagi yig'in chog'ida selekciya ishlari olib borilishi ustuvor vazifalardan biri sifatida belgilab olindi. Jamoa bu yil o'z oldiga super ligaga chiqish vazifasini qo'ygan. SHunga monand tarkibni kuchaytirish maqsadida ayni damda bir qator tajribali futbolchilar bilan muzokara olib borilmoqda. Lekin aynan qaysi futbolchilar ekanligi hozircha oshkor etilmayapti.