Suriya, Bangladesh va Hindistonni yutish uchun ikki oylik yig'in shartmi?

Bangladeshda 23-31 mart kunlari bo'lib o'tadigan saralash o'yinlarida terma jamoamiz Suriya, Bangladesh va Hindistonga qarshi bahs olib boradi va guruhda birinchi o'rinni egallagan jamoa kelasi yilgi Osiyo chempionatiga yo'llanma oladi. 1993-94 yilda tug'ilgan futbolchilar qatnashadigan Osiyo chempionati kelasi yil qaerda bo'lib o'tishi hozircha malum emas. Faqat shunisi aniqki, yarim finalga chiqqan to'rtta jamoa 2016 yilgi Rio olimpiadasiga yo'llanma oladi.

Malumki, hozir bu yoshdagi terma jamoada SHuhrat Maqsudov bosh murabbiy bo'lib ishlayapti. Va SHuhrat Maqsudov oldiga jamoani Rio olimpiadasiga olib borish vazifasi qo'yilgan. Albatta, vazifa juda jiddiy va uni bajarish oson bo'lmaydi, lekin ikkinchi tomondan saralash o'yinlarida bizga juda oson raqiblar tushganini inobatga olsak, ikki oylik yig'inning zarurati qolmaydi. Mana yaqinda bu jamoa Qirol Kubogi musobaqasida ishtirok etish uchun Tailandga jo'nab ketdi. U erda futbolchilarimiz Tailand, Janubiy Koreya va Gondurasga qarshi o'yin o'tkazishadi.

Bizni xavotirga solayotgan jihat shuki, barcha futbolchilar yangi mavsumga o'z klublarida tayyorgarlik ko'rayotgan bir paytda, bazilar hamon terma jamoadan ortmayapti. Masalan, Jamshid Iskanderov bilan Igor Sergeev shundoq ham oxirgi ikki oyni milliy terma jamoada o'tkazdi. Mana endi ularni Tailandga olib ketishdi. To'g'ri, Osiyo Kubogi qitamizdagi eng katta futbol musobaqasi bo'lgani uchun terma jamoaga chaqirilgan futbolchilarning holatini juda yaxshi tushunamiz, biroq futbolchi terma jamoadan ortmay yuraversa, qachon o'z klubida shug'ullanadi-yu, qachon mavsumga hozirlik ko'radi? Buning ustiga Qirol Kubogiga borish biz uchun shunchalik zarurmidi degan savol ham tug'iladi.

Bo'lajak olimpiya terma jamoamiz u yoqdan bir haftadan so'ng qaytib kelar ekan va katta ehtimol bilan fevralda boshqa yig'in o'tkazmaydi. Martdan esa oliy liga boshlanadi, bu yoqda Osiyo chempionlar ligasi o'yinlari bo'lib o'tadi. U-22 Osiyo chempionatiga saralash bosqichi 23 martdan start oladi va eshitishimizcha, terma jamoa Bangladeshga borishdan oldin yana kim bilandir o'rtoqlik o'yini o'tkazar ekan. Futbolchini doim terma jamoada olib yuraverish uni zeriktirib qo'yadi. SHu bois hamma o'yinchilar yangi mavsumga o'z klublarida tayyorgarlik ko'rgani maqul.

SHu hafta Asqar Tolibjonov va Mirjalol Qosimov bilan o'tkazilgan matbuot anjumanida biz yuzaga chiqarishga harakat qilayotgan savol ko'tarildi. Yani, terma jamoadagi tinmay yig'inlar tufayli avvaliga 1989larni, keyin esa 1993larning ko'pini boy berdik. (Negaki o'z vaqtida Ahmad Ubaydullaev bilan Ahmadjon Musaev ham tinmay xorijda yig'in o'tkazib, amalda hech kimni tarbiyalab bera olmagandi). Mana endi 1993larning qolganini ham aynan YIG'INLAR sabab yo'qotib qo'yishimiz mumkin. Bizga TJM direktori Asqar Tolibjonovning xayolidan nimalar o'tayotgani qorong'u, ammo fakt shuki, ketma-ket tashkil etilayotgan yig'inlar sabab ham yaxshi natijaga erisha olmayapmiz, ham tayyor o'yinchilarni sindirib qo'yyapmiz. SHunday ekan, bu masalaga shaxsan O'FF rahbari Mirabror Usmonovning aralashuvi orqali jiddiy qaralmasa bo'lmaydi.

Xayrulla Xoliqov.