Sluckining aloqaga chiqqani, "Rubin"ga qachon borib qo'shilishi va boshqa jamoalarning taklifi - Umarali Rahmonaliev

Yaqinda 19 yoshni qarshi olgan futbolchi endilikda faoliyatini Rossiyada davom ettiradi. Faqatgina u yangi jamoasiga qachon borib qo'shilishi mavhumligicha qolmoqda. Saytimiz jurnalisti Abdulaziz Iskandarov Rahmonaliev bilan suhbatlashdi. 

Rasman: "Bunyodkor" o'yinchisi Rahmonaliev "Rubin"ga o'tadi

- "Rubin" taklifi qachon va kim tomonidan bo'ldi?

- Birinchi davra yakunlanishi arafasida "Rubin" qiziqish bildirayotgani malum bo'ldi. Agentlarim tomonidan bosh murabbiy Leonid Sluckiyga  o'yinlarim tushirilgan videotasvirni ko'rsatilgan ekan. Hammasi shundan keyin boshlandi. Agentlar va murabbiy menga aloqaga chiqishdi. Jamoaga taklif qilishdi. 

- Legionerga aylanishga o'zingizni qanchalik tayyorman, deb o'ylaysiz? 

- Xorijda to'p tepish qanday bo'lishini boshimdan o'tkazmaganman. Futbolda qattiq mehnat va matonat evaziga yuksak marralarni zabt etish mumkin. Hammasini vaqt ko'rsatadi. 

- Boshqa jamoalardan ham takliflar bormidi? Nima uchun aynan "Rubin" varianti tanlandi?

- Albatta takliflar bo'ldi. Menga ko'proq "Rubin" maqul keldi. Rossiya chempionati ko'plab o'zbekistonlik futbolchilarga tramplin vazifasini o'tab beradi.  

- Yangi jamoangiz safiga qachon borib qo'shilishingiz aniq bo'lib ulgurdimi?

- "Rubin"ga qachon borishim nomalum. 

"Rubin" Rahmonalievni ushbu yozdayoq o'z tarkibida ko'rmoqchi

- "Bunyodkor" so'nggi o'yinlarni muvaffaqiyatsiz o'tkazmoqda...

- Buni omadsizlik bilan bog'lagan bo'lardim. Butun jamoadan tortib oddiy ishchiga qadar borini beryapti. Mehnat hech qachon samarasiz qolmaydi. Ishlashda davom etamiz. "Bunyodkor"ning natijalarini yaxshilash uchun bor kuchimizni sarf qilamiz. Buni amalda ko'rsatamiz.