Siroj Hamroev: "Mavsumdagi birinchi o'yinimdan ko'nglim to'ldi"

3:1 hisobida "gazchilar" g'alabasi bilan yakunlangan o'yinning boshlang'ich tarkibida uzoq tanaffusdan so'ng Siroj Hamroev tushdi. Qishgi yig'inda jarohat olgan himoyachi uchun bu o'yin mavsumdagi birinchi rasmiy o'yin bo'ldi. O'yindan so'ng futbolchi bilan suhbatlashdik.

"Qishgi yig'in davomida jarohat olganim bois orada ko'p vaqt tanaffusdan so'ng bugun yana safga qaytdim. Mavsumdagi birinchi o'yinimda ko'nglim to'ldi. Jismoniy holatimda hali kichik muammolar bo'lsa ham,  buni tez orada to'la tiklab olaman deb umid qilaman. Keyingi o'yinlarda to'la kuch bilan harakat qilishim kerak.  Kuchli raqibga qarshi munosib o'yin ko'rsatdik. Murabbiyimizning o'yinga tayyorlagan taktikasi natija olib keldi deya olaman" , - deydi o'yin haqida futbolchi.

- Oldinda jamoani qiyin o'yinlar kutib turibdi. "Neftchi" bilan o'yin borasida fikrlaringiz qanday?

"Neftchi" mag'lubiyatsiz kelmoqda. SHuni o'zi ham raqib kuchini anglatadi. Maydonga tushgandan so'ng raqibni ochkosi, turnirdagi o'rniga qarashni maqul ko'rmayman. Barcha raqiblarni hurmat qilgan holda g'alaba uchun harakat qilsak maqsadimizga etamiz.  

- Kecha bo'lib o'tgan uchrashuvda penalti ishladingiz  va bitta golga pas berdingiz. Bu himoyachi uchun yaxshi ko'rsatkich bo'lsa kerak?

Asosiysi jamoamiz g'alaba qozondi. Jarima maydonchasi ichida zarbani yo'lladim deb o'ylagan edim. Simulyaciyani o'ylaganim ham yo'q. Bosh hakam yaqin bo'lgani bois bu vaziyatni to'g'ri baholay oldi. Ikkinchi bo'limda ko'rsatgan o'yinimiz o'zimizga ham yoqdi.

- Bu yil oldingizga qo'ygan maqsadlar qanday ?

Birinchi navbatda jamoamiz bilan kuchli to'rtlikka kirishni maqsad qilganmiz. Keyingi mavsum OCHL uchun beriladigan yo'llanmani qo'lga kiritmoqchimiz. Buning uchun kuchli raqiblarga qarshi munosib o'yin ko'rsatib , natijaga erishishimiz kerak. Undan tashqari o'zim eng yaxshi o'yinlarim bilan  O'zbekiston milliy terma jamoasiga kirishni istayman. Oldimga qo'ygan eng katta maqsadlarimdan biri ham shudir.