"SHo'rtan" - Robin Gudmi?

Robid Gud - ingliz xalqi qahramonlaridan biri bo'lib, u asosan qaroqchilik bilan shug'ullangan. Eng katta qilgan ishi boylikni boylardan o'g'irlab kambag'allarga tarqatgan.

Robin Gudning futbolga nima aloqasi bor dersiz? Bor ekan, bo'lganda ham "SHo'rtan" Robin Gud timsolini o'zbek futboliga singdira oldi. Gap shundaki, g'uzorliklar bu yil oliy ligada juda g'alati o'yin namoyish etishmoqda.

Hozirda bu jamoa 12ta o'yindan so'ng 12 ochko jamg'argan holda 13-o'rinda bormoqda. "SHo'rtan" to'rtta o'yinda g'alaba qozongan va 8 ta bellashuvda mag'lub bo'lgan, hali durang o'ynamagan. To'plar nisbati 11-17.

Qizig'i shundaki, "SHo'rtan"ning barcha g'alabalari uydagi uchrashuvlarda qo'lga kiritilgan. G'uzorliklar uyda "Lokomotiv", "Paxtakor" "Neftchi", "Bunyodkor" kabi nomdor klublardan ustun kelgan-u, biroq "Mashal", "Qo'qon-1912" jamoalariga yutqazib qo'ygan. Jamoa kecha o'z maydonida yana mag'lub bo'ldi.

O'z maydonida "Neftchi" va "Bunyodkor"ni 1:0 yutgan jamoa, "Lokomotiv"dan 2:0, "Paxtakor"dan esa 3:0 hisobida ustun kelgan. Va eng muhimi, "SHo'rtan" g'alaba qozongan o'yinlarda darvozasidan gol o'tkazib yubormagan.

"SHo'rtan" kecha "Olmaliq"qa qarshi bahs olib borib, 0:1 hisobida mag'lubiyatga uchradi. O'yindagi yagona gol Dilshod Jo'raev tomonidan kiritildi. Jamoa murabbiylarining aytishicha, o'yin ancha zerikarli kechgan va bitta gol bahs taqdirini hal etgan. Darvoqe, kechagi g'alabadan keyin "Olmaliq"ning ketma-ket mag'lubiyatsiz seriyasi sakkizta o'yinga etdi.

"SHo'rtan"ga kelsak, bu jamoa nomdor klublardan ochko olishga olyapti-yu, lekin o'rtamiyonalar bilan o'yinda yutqazib qo'yyapti. Qanday qilib uyda "Loko", "Paxtakor", "Bunyodkor"dan ustun kelgan jamoa "Mashal", "Qo'qon-1912" va "Olmaliq"qa yutqazib qo'yishi mumkin, hayronmiz. Ehtimol bularning bari o'yinga bo'lgan yondoshuv hamda ruhiyat bilan bog'liq bo'lishi mumkin.

SHunday qilib, g'uzorliklar kuchlilardan ochko olib, o'zi qatori jamoalarga ochko berishda davom etyapti. Bir so'z bilan aytganda, Robin Gud misoli harakat qilmoqda.

X.Xoliqov.