SHerzod Esanov “Andijon” muxlislari bilan xayrlashdi

O'zbekiston U-23 terma jamoasi yarim himoyachisi klub muxlislariga o'z minnatdorchiligini bildirdi.

“Qadrli “Andijon” muxlislari!

Men hayotimdagi bu muhim lahzalarni hech qachon unutmayman. Hurmatli andijonliklar va jamoa muxlislari, har bir o'yinda tinimsiz qo'llab-quvvatlab borganingiz uchun sizlarga chin dildan rahmat aytaman.

Maydondagi har bir daqiqamda sizning qo'llovingizni his etib, rohatlanib harakat qildim. SHubhasiz, sizlar O'zbekistondagi eng yaxshi muxlislarsizlar!

Murabbiylar shtabi, jamoadoshlarim, tibbiyot xodimlari, mamurlar va barcha xodimlarga tashakkurimni bildiraman.

Yangi sarguzashtlarni boshdan kechirish payti keldi. “Andijon”ga esa yangi marralarni zabt etishini tilayman. Ular sizning ishonchingizni oqlashiga ishonaman!”, dedi Esanov.

Eslatib o'tamiz, 21 yoshli futbolchi faoliyatini Rossiyaning "Akron" jamoasida davom ettiradi. Mavsumning birinchi qismida u O'zbekiston chempionati va kubogida hammasi bo'lib 15 ta bellashuvda ishtirok etib, 2 ta gol muallifiga aylandi.