SHavkat Saidov: "Mazkur g'alabalar Bekobod ahli va Metallurgiya kombinatining yutug'i"

- Dastlabki ikki uchrashuvini boy bergan “SHo'rtan” Bekobodga jiddiy tayyorgarlik bilan kelishini kutgandik. SHunga yarasha futbolchilarning ham jismoniy, ham ruhiy tayyorgarligiga katta etibor qaratdik. O'z navbatida muvaffaqiyatga erishishimizda tezkor ravishda kiritilgan gollar qaysidir manoda yordam berdi. SHuningdek, biroz xotirjamlikka berilishimiz oqibatida bu holat biz uchun salbiy xizmat ko'rsatishiga ham bir bahya qoldi. Vaqtida o'yinchilarni almashtirishda yanglishmadik. Yana tashabbusni qo'lga olib, uchinchi golni kiritdik.

Garchi, uchrashuv so'nggida g'uzorliklar penaltidan farqni qisqartirishga erishgan bo'lsa-da, g'alabani saqlab qolishimizga shubha qilmagandim. Ketma ket yutuqlar bilan muxlislarmizga katta xursandchilik ulashgan o'yinchilarimizga minnatdorchilik bildiraman. Bu zafarli yurishlarimiz bardavom bo'lishini istab qolamiz. SHu o'rinda mazkur g'alabalar faqatgini “Metallurg”niki emas, balki Bekobod ahli, Metallurgiya kombinatining yutug'i deb bilaman. Zero ularning qo'llab-quvvatlashlarisiz biz bunday ijobiy natijalarga erishmagan bo'lardik, - deydi SHavkat Saidov.