Serxio Ramos Ispaniya terma jamoasidagi faoliyatini yakunlaganini elon qildi. Afsonaviy himoyachi unga qilingan munosabatdan norozi

PSJ klubi himoyachisi Serxio Ramos Ispaniya terma jamoasidagi faoliyatini tugatganini rasman malum qildi. Ramos bu qarorga terma jamoaning yangi murabbiyi Luis de la Fuente bilan suhbatdan so'ng kelgan. 

Quyida Ispaniya terma jamoasi afsonasi Serxio Ramosning xayrlashuv so'zlarini etiboringizga taqdim etamiz. Ushbu xayrlashuv xatida Serxio Ramos o'ziga nisbatan adolatsizlik qilingani haqida yozgan. 

"Vaqti keldi. Ispaniya terma jamoasiga xayr deyish fursati etdi. Qizil furiyaga. Bugun tongda Ispaniya terma jamoasi bosh murabbiyi bilan qo'ng'iroqlashdim. Murabbiy men klubda qanday o'yin ko'rsatishimdan qatiy nazar uning rejalariga kirmasligimni bildirdi. 

Qanchalik og'ir bo'lmasin, bu men uzoqroq davom etishini istagan va chiroyliroq yakunlanishi kerak deb bilgan yo'lning oxiri. Men chin dildan terma jamoadagi faoliyatim aynan o'z xohishim bilan yoki darajam terma jamoaga tortmay qolgandagina yakunlanishi kerak edi deb hisoblayman. Bu narsa menga to'g'ridan-to'g'ri aytilmagan bo'lsa ham, sezganimdek,  mening yoshim yoki boshqa sabab bilan bo'lmasligi kerak edi. Sababi yosh bu kamchilik hisoblanmaydi. Yosh bu shunchaki raqam va u natijalarga yoki qanday o'yin ko'rsatishga doim ham tasir qilmaydi. Men Modrich, Messi va Pepe kabi o'yinchilarga havas qilaman. Ular futboldagi adolat, ananalar va qadr-qimmat tushunchalariga yorqin misollar. Afsuski, menda bunday bo'lmadi. Sababi, futbol doim ham adolatli emas va futbol hech qachon shunchki o'yin bo'lib qolmaydi. 

Nima bo'lsa ham, bu narsani qabul qilishim va sizlar bilan bo'lishishim lozim. Muxlislarning shuncha yil davomida meni qo'llaganliklari uchun minnatdorchilik bildirgan holda, boshimni tik tutib bu narsani qabul qilaman. Menda unutilmas xotiralar qoldi. Barcha sovrinlarni qo'lga kiritdim. Bu sovrinlarni birgalikda nishonladik. Men eng ko'p sovrinlarga ega ispaniyalik sifatida g'urur hisini tuymoqdaman. Bu belgi, libos va siz muxlislar meni baxtli qildingiz. Men o'z terma jamoamni shu jamoa sharafini 180 marta himoya qilgan omadli inson sifatida qo'llab-quvvatlashda davom etaman. Menga ishongan barchaga yuragimning tubidan rahmat deb qolaman!", -deb yozadi Serxio Ramos.