Server Jeparov: "O'ynashga to'liq tayyorman"

Bir necha yillik tanaffusdan so'ng Jeparov shu kuni oliy ligadagi dastlabki bahsini o'tkazdi. Uchrashuvdan so'ng Jeparov o'z fikrlarini bildirib o'tdi.

-Albatta, safarda uch ochkoni qo'lga kiritish yoqimli, - deb so'zini boshladi Jeparov. – Bugungi bellashuvda tajriba hamda o'yin mahorati evaziga g'alaba qozondik, deb o'ylayman. Maydon egalariga hech qanday imkoniyat qoldirmadik. O'zimiz yaratgan vaziyatlarning uchtasidan unumli foydalangan holda ishonchli g'alabaga erishdik. Garchi maydonning holati yaxshi o'yin ko'rsatish imkonini bermagan bo'lsa-da, natijaga erisha oldik. Bunday maydonlarda o'ynash doim qiyin bo'ladi.

- Andijonda oxirgi marta o'ynaganingizga ham bir necha yil bo'libdi...
- Ha, 6 yil avval bu erga kelgandim. O'shandan beri qanday o'zgarishlar bo'lgan bo'lishi mumkin. Faqat shuni aniq aytishim mumkin, maydonning holati o'sha-o'sha. Boshqa jihatlarda o'zgarishlar bor. Bilishimcha, bu yil Andijonda yangi jamoa shakllanmoqda. “Andijon”ning keyingi o'yinlariga omad tilayman.

- CHempionat to'g'risida nima deysiz? Uzoq tanaffusdan keyin bugungi birinchi o'yiningizni o'tkazdingiz.
- Nima deyishim mumkin? So'nggi yillarda chempionatimiz bahslari qiziqarli o'tayotganini bilardim. Bu yil ham shunday o'tishiga umid qilaman. Ammo shuni ham aytish kerakki, ko'p joylarda maydonlarning holati hali ham yaxshi emas. SHunga qaramay, sifatli maydonlar ham ko'payib bormoqda. O'ylaymanki, bu yilgi mavsum yanada qiziqarli o'tadi. 

- Jarohat tufayli bungacha ikkita o'yinda tarkibdan chetda qoldingiz. Bugun esa ikkinchi bo'limda maydonga tushirildingiz. Ayni paytda holatingiz qanday?
- Hammasi ortda qoldi va hozir juda yaxshi holatdaman. Umuman olganda, o'ynashga to'liq tayyorman. Bugungi bellashuvda murabbiylar meni ikkinchi taymda tushirishga qaror qilishdi. CHunki bizni tez orada Osiyo CHempionlar ligasida, Eronda qiyin uchrashuv kutib turibdi.

"Andijon" matbuot xizmati