Server Jeparov: Katta ehtimol bilan xorij klublarining biriga o'taman

Yil boshida Ulsan Xyunday safiga qo'shilgan hamyurtimiz ushbu klub safida 22ta o'yinda maydonga tushib, 6ta golga mualliflik qildi. Jeparov Koreya K-ligasida 5 mavsum to'p surdi. Umuman olganda, terma jamoamizning vice-sardori legioner sifatida 2010-2011 yillarda Seul, 2011-2013 yillarda Saudiya Arabistonining Al-SHabab, 2013-2014 yillarda Seongnam Ilva CHunma kabi xorij klublarida faoliyat olib borgan. Biz bilan suhbatda Jeparov rejalari bilan o'rtoqlashdi

- Server, "Ulsan" bilan xayrlashi siz uchun kutilmagan holat bo'ldimi?

- ...

- Jamoa bilan shartnomangiz tugayotganmidi?

- Xuddi shunday. Klub bilan mavsum boshida bir yillik shartnomaga imzo chekkan edim.

- Endi rejalar qanday?

- O'zim uchun yangi jamoa izlayman.

- O'zingizga qolsa, Ulsan bilan shartnomani uzaytirishni istarmidingiz?

- Ikki tomon o'zaro kelishgan holda shunday qarorga keldik. Bundan afsusda emasman. Ulsan Xyunday bilan shartnomam 31 dekabr kuni yakunlanadi. SHunday ekan, men hali-hamon Ulsan azosiman. Lekin shunisi aniqki, kelishuv boshqa uzaytirilmaydi.

- Balki O'zbekistonga qaytish fursati kelgandir?

- Men bunday deb o'ylamayman. Umid qilamanki, hali xorij klublarining birida o'ynash imkoniyati yuzaga keladi. Bunga kuch-quvvatim etadi.

- Xorij klublaridan takliflar bo'lyaptimi?

- Hali ozod agentga aylanmadim. SHartnomamning bir kuni qolgunicha ham u kuchda bo'ladi. Lekin takliflarni ko'rib chiqishga tayyorman. Og'zaki qiziqishlar bor. Tez orada qiziqish bildirayotgan klublar nomi oydinlashib qoladi.

- Arab klublari, balki Qozog'iston jamoalaridan takliflar tushar? SHunday bo'lgan taqdirda, ularga qanday munosabatda bo'lasiz?

- Oldin taklif bo'laversin-chi,  ko'rib chiqish qochmaydi. Katta ehtimol bilan yangi mavsumni ham xorij klublarining birida boshlayman.

Kamoliddin ALIMOV suhbatlashdi