Sergey SHevchenko “Andijon”ni tark etdi

Olingan malumotlarga ko'ra, Sergey SHevchenko bugun yurtiga qaytib ketdi. Bunga sabab sifatida jamoadagi vaziyat ijobiy tomonga o'zgarmagani aytilmoqda. Klubning ijrochi rahbarlari bilan fikrlari bir joydan chiqmagan murabbiyning rejasi ham tabiiyki amalga oshmadi. Muxlislar Sergey Yakovlevichni jamoada qolishini qanchalik istamasin, murabbiy vataniga qaytishga qaror qildi. CHunki uning klub sport direktori Aleksandr SHapran bilan chiqisha olmagan. Aftidan SHapran “Andijon”ga boshqa murabbiyni olib kelish niyatida.

Aytish mumkinki, SHevchenko ayrim sabablarga ko'ra, rasman “Andijon” murabbiyi sifatida bo'lmasada, mashg'ulotlarni o'zi o'tkazib, selekciya ishlarini ham uning o'zi olib borgandi. O'yin paytida esa murabbiylar shtabidan o'rin olmay kelayotgan murabbiy qisqa fursat ichida “Andijon” bilan xayrlashadigan bo'ldi. Albatta bunday bo'lishini SHevchenkoning o'zi ham kutmagan bo'lsa kerak.

Darvoqe, SHevchenkoning yaqin yordamchisi Boris Beloshapka ham “Andijon”da darvozabonlar bilan ishlovchi murabbiy sifatida faoliyat yuritib kelayotgandi. Malum bo'lishicha, ushbu mutaxassis ham yurtiga qaytib ketgan.

Yozda klub rahbariyatida ish boshlashi kutilgan Mo'minjon Maqsudov va Rustam Abdievga hamon jamoada ish boshlashi uchun buyruq chiqmagan. Bu esa jamoani boshsiz chavondozga o'xshatib yubormoqda. O'zining 50 yillik yubiley to'yida yana birinchi ligaga tushib ketish havfi ostida turgan “Andijon”da parokandalik yuz bergan desa ham bo'ladi. Aftidan jamoa oldingi yo'l qo'yilgan xatolardan kerakli xulosalar chiqarib olmagan ko'rinadi. Ko'ramiz, vaziyat qanday tus olarkin.