Seid Seidov: “Oliy ligadan kim tushib ketishi oxirgi turda hal bo'ladi”

Turkmanistonlik murabbiyning fikrlari quyidagicha bo'ldi.

-   Avvalo “Paxtakor”ni haqli g'alaba va qo'lga kiritilgan chempionlik bilan tabriklayman. “Paxtakor” bu mavsum o'zini ko'rsata oldi va buning natijasida mavsum oxirlariga kelib chempionlikni nishonladi. “Paxtakor”ning kuchsiz tomonlari yo'q hisobi, tarkibda yaxshi futbolchilar yig'ilgan va bunday jamoaga qarshi tengma-teng bahs olib borish oson emas. Biz qo'ldan kelgancha o'ynadik, ijobiy natija ko'rsatishga harakat qildik, ammo qo'limizdan kelmadi. Bugungi kunda “Buxoro”ning saviyasini “Paxtakor” bilan solishtirib bo'lmaydi. “Paxtakor” raqibga qarab taktika tanlagani yo'q, balki har doimgidek o'z o'yinini namoyish etdi.

-   O'yin davomida “Buxoro”ning ayrim o'yinchilari jamoa oliy ligada qoladimi yo tushib ketadimi, go'yoki buning farqi yo'qdek harakat qilishdi?
-   Bu borada nima deyishim mumkin? Fikringizga qo'shilaman. Aksariyat futbolchilar uchun chempionat tugab bo'ldi. Balki bazi o'yinchilar allaqachon o'zlarini boshqa jamoada ko'rayotgan bo'lishi mumkin.

-   “Buxoro”ning oliy ligada qolish imkoniyatlarini qanday baholaysiz?
-   Men har doim biz oxirigacha kurashamiz deb aytib kelganman va hozir ham shu fikrda qolaman. Menimcha, oliy ligani kim tark etishi oxirgi turda hal bo'ladi. Imkoniyat bizda ham, “So'g'diyona”da ham bor. Ikkita o'yinimiz qoldi: safarda “Dinamo” va uyda “Lokomotiv” bilan. Mana shu bellashuvlardan so'ng taqdirimiz malum bo'ladi.

X.Xoliqov yozib oldi.