Sarvar Karimov: “So'g'diyona” bilan o'yindan oldin yig'ilib qolgan mukofat pullarimizni yarmini oldik"

Mazkur uchrashuvdan so'ng “qaldirg'ochlar” darvozaboni Sarvar Karimov bilan suhbatlashdik.

O'yin to'g'risida

- Bugungi o'yin 6 ochkolik bahs edi desam aslo mubolag'a bo'lmasdi. SHu bois jamoadoshlarim bilan mashg'ulotlarda jiddiy tarzda tayyorgarlik ko'rgandik. Maqsadimiz g'alaba qozonish va ochkolarimiz miqdorini ko'paytirib olish edi. Vaziyatlardan foydalana olmaganligimiz sababli durang qayd etildi. Yutishni juda hohlagandik.

- “So'g'diyona” ko'rsatgan o'yin borasida fikrdasiz?

- Mezbonlar safida tajribali futbolchilar bor. Tabiiyki, ular jamoaning o'yinining asosini tashkil qiladi. Bugun jiddiy qarshilikga duch keldik. SHunga qaramay, biz o'yinda ikki ochko yo'qotdik.

- Jamoaning oldiga qanday vazifa qo'yilgan?

- “Bunyodkor”ning maqsadi doimo sovrinli o'rinlarni egallash bo'lgan. SHu sababli har bir o'yinga jiddiy tayyorgarlik ko'rib, uchrashuvlarda imkon qadar ochko yo'qotmaslik uchun maydonga tushyapmiz. Hali mavsumning asosiy o'yinlari oldimizda. Mazkur bahslarda ijobiy natijalarga erishish uchun oxirigacha kurashamiz.

- Olgan malumotlarimizga ko'ra, “Bunyodkor”da moliyaviy holat yaxshilangan...

- Ha albatta. Moliyaviy ahvolimiz yaxshilanmoqda. Klub yana “O'zbekneftgaz” qarmog'iga o'tdi. O'yindan oldin yig'ilib qolgan mukofat pullarimizni yarmini oldik. O'ylashimcha, jamoamizda endilikda moliyaviy muammolar bo'lmaydi.