Sardor Mirzaev: "Gol urishimizni sezgandim"

To'g'ri, butun o'yin davomida ustunlik yigitlarimizda bo'ldi deya olmaymiz, lekin eng asosiysi turnir biz uchun omadli boshlandi va tabiiyki uch ochko o'z hisobimizga yozdirib qo'ydik. O'yinga zaxiradan qo'shilgan Sardor Mirzaev hujumkorlikni oshishiga salmoqli hissa qo'sha oldi. SHu bois bahs poyoniga etgach, Mirzaevdan blic intervyu oldik.

- Sardor, avvalo qo'lga kiritilgan g'alaba bilan tabriklaymiz. Uchrashuv haqida qanday fikrdasiz?
- Tabrik uchun rahmat. O'zingiz ham ko'rgan bo'lsangiz kerak, uchrashuv juda qiyin kechdi. Turnirni g'alaba bilan boshlash ishtiyoqi bizda kuchli edi. SHuning uchun o'yin oxiriga qadar astoydil kurashdik. Guvohi bo'lganingizdek, yakunda irodali g'alabaga erishdik. Bundan hozir juda xursandmiz. Butun O'zbekiston xalqiga keyingi bahslarda ham mana shunday xursandchilik taqdim etishga, bor kuchimiz bilan xarakat qilamiz.

- Aslida Xitoydan qanday o'yin kutgandinglar?
- Bu jamoa oddiy raqib emasligini oldindan bilardik. Lekin jismoniy tayyorgarlikni inobatga olmaganda, ulardan har tomonlama ustun edik.

- Zaxiradan maydonga tushayotganingizda bosh murabbiy qanday ko'rsatma bergandi?
- Eng avvalo hujum tashkil etishda yordam berishim kerakligini uqtirgandi. Qolaversa himoyaga o'tib ham o'ynashim muhimligini takidladi.

- Uchrashuvga zaxiradan qo'shilishingiz bu oldindan rejalashtirilgan taktik sxema edimi yoki boshqa sababi bormi?
- Yo'q buni taktika deb bo'lmaydi. Murabbiy shuni xohladi. Balki bu uning oldindan qilingan rejasidir. Lekin men uchun qaysi vaqtda maydonga tushish u qadar muhim emas. Asosiysi vatan jamoasi uchun 1 daqiqa o'ynasam ham, bor kuchim bilan xarakat qilib, foydam tegishini istayman.

- Aynan nimaning evaziga Xitoyni mag'lub etdik deb hisoblaysiz?
- Bizni yigitlarda klass degan narsa kuchli. Aynan shuni hisobiga irodali g'alabaga erishdik.

- Faqat ochig'ini ayting, 0:1 hisobida yutqazayotgan paytda, uni g'alabaga aylantirib yuborishinglarga qanchalik ishongandiz?
- SHaxsan men maydonga chiqayotganimda gol urishimizni xis qildim. G'alaba yoki boshqa narsalarni sezmadim.

- Sizningcha, terma jamoamiz safida eng yaxshi o'yin ko'rsatgan futbolchi kim bo'ldi?
- G'alaba butun jamoaniki. Bunda biror-bir shaxsni alohida ko'rsatib o'tish qiyin. Maydonda to'p tepgan o'yinchilardan tortib, zaxiradagi futbolchilar va murabbiy shtabining xissa bor deb bilaman.

Islombek Rustambekov suhbatlashdi.