Sami Al Jaber: "Menimcha, finalda "Al Hilol" 2:1 hisobida g'alaba qozonadi"
25 noy 2017 12:25
Yangiliklar

Sami Al Jaber: "Menimcha, finalda "Al Hilol" 2:1 hisobida g'alaba qozonadi"

Teglar : Al Hilol Sami Al Jaber OCHL final

Bugun Osiyo chempionlar ligasining ikkinchi final uchrashuvi bo'lib o'tadi. Yaponiyaning Saytama shahrida kechadigan bahsda "Urava Reds" Saudiya Arabistonining "Al Hilol" klubiga qarshi maydonga tushadi. Malumki, birinchi o'yinda 1:1 hisobi qayd etilgan.

"Al Hilol" afsonalaridan biri Sami Al Jaber bugungi uchrashuv oldidan OFK rasmiy saytiga intervyu berdi. Al Jaber 2000 yil "Al Hilol" ushbu musobaqada g'olib chiqqan, faqat o'shanda musobaqa CHempionlar kubogi deb yuritilardi.

- "Al Hilol"ning bu yil OCHLda muvaffaqiyatli ishtiroki sababi nimada?
- Biz "Al Hilol"ni doim bir tekis o'ynaydigan jamoa sifatida bilamiz. Bu erda klub murabbiylari va futbolchilar bir tekis ish olib borishadi. 2009 yildan boshlab klub oldiga qisqa, o'rta va uzoq muddatli rejalar qo'yildi va klub navbati bilan ushbu rejalarni amalga oshirishga harakat qilib kelmoqda.

- Omar Xrbinning o'yini sizda qanday taassurot qoldiryapti?
- U shubhasiz hozirgi paytda Osiyoning eng kuchli hujumchilaridan biri. Xrbin "Al Hilol"ga kelganidan beri muntazam ishlamoqda va yangi jamoaga tezda moslashib oldi. Suriyalik hujumchi "Qirol Kubogi"da zafar quchishimizga yaqindan yordam berdi. U "Urava" bilan kechgan birinchi bahsda uchta to'p kiritishi mumkin edi, biroq faqat bitta gol bilan kifoyalandi. Lekin javob o'yinida o'zini to'liq ko'rsata oladi.

- Finalning ikkinchi uchrashuvidan nima kutyapsiz?
- Ar Riyodda kechgan bahs "Al Hilol"ning ustunligida kechdi va buni hamma ko'rdi. Birinchi taymning o'ziyoq bizning jamoa foydasiga 3:1 yoki 4:1 bo'lishi mumkin edi. Ammo futbolchilarimiz qulay imkoniyatlardan foydalana olishmadi, qolaversa raqib darvozaboni ham o'z ishini yaxshi bajardi. Albatta, Karlos Eduardoning jarohat olishi chatoq bo'ldi, bu bilan "Al Hilol" 30 foiz kuchini yo'qotdi. Ammo bizda Navaf Al Obid, Salim Dovsari, Omar Xrbin kabi futbolchilar bor va hammamiz jamoaga ishonamiz.

- Siz "Al Hilol"da 20 yilni o'tkazgansiz. Qanday xotiralar yodda qolgan?
- Esda qolarli xotiralar nihoyatda ko'p. Men bu jamoada o'ynashni boshlaganimda 14 yosh edim. Faqat "Vulverxempton"ga ijaraga berilganimda bu klubda to'p tepmaganman, qolgan vaqt doim "Al Hilol" bilan bo'lganman.

- Finaldan qanday natija kutyapsiz?
- Albatta, "Al Hilol"ning g'alabasini. Menimcha, biz 2:1 hisobida zafar quchamiz.