Salim Zokirov: “Birinchi ligada hamma jamoalarning kuchi teng”

Bungacha jamoa ketma-ket oltita o'yindan beri g'alaba qozona olmay kelayotgandi (bir durang, besh mag'lubiyat). Bugun “Yozyovon-Lochinlari” uyda “Zomin”ni qabul qiladi. Mazkur uchrashuv arafasida klub bosh direktori Salim Zokirovni suhbatga tortdik. 

-Jamoangiz ketma-ket 6ta g'alabasiz o'yindan so'ng va nihoyat g'alaba qozondi. Bu sizlar uchun qanchalik qiyin bo'ldi?

-“G'allaorol”ga qarshi uchrashuv albatta qiyin o'tdi. So'nggi o'yinlarda  mag'lubiyatga uchraganimizdan so'ng futbolchilarimizda ham g'alabaga bo'lgan ishonch kamayib qolgandi. SHuning uchun “G'allaorol” bilan bahsda ancha qiyinchilikka duch keldik. Birinchi bo'limni 2:1 hisobida yakunladik. Ikkinchi bo'lim boshida raqib darvozasini ishg'ol qildik va g'alabaga bo'lgan ishtiyoq oshdi. Natijada 6:1 hisobida zafar quchdik.  

-Jamoangiz oldida “G'allaorol” shunchalik kuchsiz ko'rindimi?

-“G'allaorol” shunchaki kuchsiz ko'rindi degan fikrdan yiroqman. Raqibimiz birinchi bo'limda bizdan yaxshiroq o'yin ko'rsatdi. O'z darvozamizdan to'p o'tkazib yuborganimizdan so'ng futbolchilarimiz xayajonga tushib qolishdi. Lekin ketma-ket to'rtta goldan so'ng ular mag'lubiyatni tan olishga majbur bo'lishdi. 

-“Zomin” bilan o'yindan qanday natija kutyapsiz? 

-Bugun “Zomin”ga qarshi uchrashuvda g'alaba qozonishimiz kerak. Bugun mag'lubiyatga uchrasak birinchi ligada qolish imkoniyatimiz yanada pasayib ketadi. SHuning uchun bizni uch ochkodan boshqasi qoniqtirmaydi. Biz uchun ikkinchi davra birinchi davraga qaraganda qulay bo'ladi. Ko'pchilikning xabari bor, stadionimiz boshqatdan tamirlanmoqda. Ikkinchi davrani yangi stadionda boshlaymiz. Birinchi ligada ishtirok etayotgan barcha jamoalar deyarli teng. Birinchi o'rindagi ham oxirgi pog'onadagi jamoa ham bir xil. Hech biri kuchli emas. “Zomin”ga qarshi uchrashuvga barcha futbolchilar 100 foiz tayyor. 

Jahongir Sotvoldiev suhbatlashdi