Rustam Umarov: "O'zbekistonda futzalni unutib qo'yishgani achinarli holat"

Unda O'zbekistonning amaldagi chempioni AGMK futzal klubi ham ishtirok etadi. 18 may kuni ushbu musobaqaga qura tashlash marosimi bo'lib o'tdi. Quraga ko'ra AGMK "D" guruhida "Mes Sungun Varzagxan" (Eron), "Bank Beyrut" (Livan) va "Sipar" (Tojikiston) klublari bilan o'ynaydigan bo'ldi.

Osiyo chempionatidagi raqiblar haqida O'zbekiston terma jamoasi va AGMK klubi posboni Rustam Umarovning fikrlari bilan qiziqdik:

- Rustam aka, guruhdagi raqiblar haqida nima deya olasiz?
- Barchamiz Eron terma jamoasining kuchini bilamiz. Futzal Eronda qanday darajda ekanini ko'pchilik biladi. Agar o'tgan yil "Mes Sungun Varzagxan" klubi Eronda chempion bo'lgan bo'lsa demak juda kuchli hisoblanadi. Klub tarkibiga etibor qilsak Hussayin Toyibi, Alirizo Samimi kabi futzalchilarni ko'rishimiz mumkin.

"Bank Beyrut" bir necha yillardan buyon o'zbek klublari bilan bir guruhdan o'rin oladi. Eng qizig'i ushbu jamoani hech qachon yuta olmaganmiz. Tarkibidan ko'plab futzalchilar Livan terma jamoasi sharafini himoya qilishadi. Ularning ko'pchiligi bilan juda yaxshi tanishman.

So'nggi yillarda Tojikiston va Qirg'izistonda futzal chempionatlari rivojlanib bormoqda. "Sipar" klubi biz uchun sirli hisoblanadi. Osiyo chempionatida oson bo'lmagan guruh bizga tushdi deya olaman.

- AGMK bu yil guruhdan chiqa oladimi?
- Tarkibimiz yomon emas. Menimcha Osiyo chempionatiga yaqin yanada kuchayib olsak kerak. Barchasi bizga bog'liq. Bu futzal, to'p yumaloq. Agar kayfiyat bilan o'ynasak barcha bilan o'ynash mumkin. Ha, guruhimiz og'ir buni inkor qilmayman. Ammo ko'p narsa o'zimizga bog'liq.  

- Bu yildan futzal bo'yicha O'zbekiston chempionati yangi formatda o'tkazilmoqda. Bunga munosabatingiz?
- Juda qiziqarli tizim. Bu biz uchun yangilik bo'ldi. Har bir shahardagi muxlislar futzalni tomosha qilish imkoniyatiga ega bo'lmoqda. Biroq afsuski raqobat kamligi odamni xafa qiladi. Asosan 4ta klub chempionlik uchun kurashmoqda. Qolgan klublarning maqsadini tushuna olmayapman.

- Muxlislarga aytar gapingiz bormi?
- Yurakni g'ash qilgan jihat haqida gapirmoqchiman. O'zbekiston chempionati davom etmoqda. Ammo hech bir OAV va televidenie futzalni yoritmay qo'ygani afsuslanarli holat. Do'stlarim mendan chempionat bo'layaptimi o'zi deb so'rashmoqda. Ko'chada odamlar futzalni unutib qo'yishgani juda achinarli.  

Narzullla Saydullaev suhbatlashdi