Rustam Tolibjonov: "Joriy yil bolalar o'rtasida 1000ga yaqin musobaqa va tadbirlar o'tkazish rejalashtirilgan"

Bolalar futboli murabbiylarini malakasini oshirish uchun xorijdan bir qator mutaxassislar taklif qilinyapti, turli yoshdagi bolalar va o'smirlar o'rtasida musobaqalar tashkil etilmoqda.

O'zbekiston Futbol Federaciyasi Texnik rivojlantirish boshqarmasi direktori Rustam Tolibjonov bolalar futbolini rivojlantirish borasida amalga oshirilayotgan ishlar va 2018 yildagi rejalar haqida o'z fikrlarini bildirib o'tdi.

"O'tgan yilda bolalar va o'smirlar o'rtasida sog'lom turmush tarzini targ'ib qilish va futbolni ommalashtirish borasida bir qator musobaqalar tashkil etilib, turli tadbirlar o'tkazildi. Birgina misol keltiradigan bo'lsak, dekabr oyida Toshkent shahridagi har bir tumanda joylashgan maktab va maktabgacha talim muassasalarida hamda imkoniyati cheklangan bolalar bilan ishlash internatlarida "Kelajak umidlari" deb nomlangan tadbirlar o'tkazildi. Ushbu tadbirlarda O'FF vakillari va mashhur futbolchilar ishtirok etib, kelajagimiz umidlari bo'lgan bolalarga O'zbekiston Respublikasi Prezidenti sovg'asi sifatida to'plar va sport formalari, shuningdek, Faxriy yorliqlar topshirildi.

2018 yilda ham butun respublika bo'ylab bolalar va o'smirlar o'rtasida 1000ga yaqin chempionatlar, birinchiliklar, Kubok bellashuvlari, musobaqalar va festivallar o'tkazish rejalashtirilgan. Ushbu tadbirlarga respublikamizning barcha hududlaridagi 7 yoshdan 18 yoshgacha bo'lgan bolalar va o'smirlar jalb qilinadi.


Bunday musobaqalarni o'tkazishdan asosiy maqsad, turli yoshdagi terma jamoalar uchun nomzodlarni saralab olishdan iborat bo'lib, bir qator hududiy va O'FF selekcionerlari mazkur tadbirlarni kuzatib borishi rejalashtirilgan. SHuningdek, bunday tadbirlar orqali mamlakatimizdagi o'g'il va qiz bolalarni futbol bilan tizimli ravishda shug'ullanishga jalb qilish ham ko'zda tutilgan.

Bundan tashqari, mazkur musobaqalar hakamlar uchun tajriba maydoni bo'lib xizmat qiladi. Uchrashuvlarni boshqarib borishga jalb qilingan hakamlar faoliyati instruktorlar tomonidan baholab boriladi va yo'l qo'yilgan kamchiliklarni bartaraf etish, hakamlar saviyasini yanada oshirish uchun tegishli ko'rsatmalar beriladi.

Yil davomida o'tkaziladigan musobaqalar uchun butun respublika bo'ylab sport majmualari va maydonlar beg'araz taqdim qilinishi ko'zda tutilgan.

Tadbirlar davomida ishtirokchilarga O'zbekiston Respublikasi Prezidenti sovg'alari sifatida to'plar, sport liboslari, faxriy yorliqlar taqdim etiladi. SHuningdek, musobaqa g'oliblariga Kuboklar, medallar va qimmatbaho sovg'alar topshirilishi rejalashtirilgan", - deydi O'FF Texnik rivojlantirish boshqarmasi direktori.