Rustam Mirsodiqov: “Ramziy terma jamoaga kirganimdan xursandman”

Katta ehtimol bilan Rustam To'xtamurodovichning o'zi bundan bexabar deya u kishining o'zi bilan bog'landik.

- Rustam aka, matbuotni kuzatib borasizmi? Gazeta va internet saytlarida chiqayotgan xabar va yangiliklarga qiziqishingiz qanday?
- To'g'risini aytsam, oxirgi yillarda matbuotni deyarli kuzatmay qo'yganman. Odamni yoshi o'tgan sari qandaydir avvalgidek qiziqish bo'lmay qolarkan. Lekin shogirdlarim o'zimizga aloqador bo'lgan maqolalar chiqsa, aytib turishadi.

- “SA” sayti oliy liganing har bir turidan so'ng ramziy terma jamoa tuzib chiqadi. 25-tur yakunlariga ko'ra, bosh murabbiy sifatida siz qayd etildingiz.
- Ochig'i, bundan ham xabarim yo'q. Lekin xursandman. Mexnatimizni qadrlaganinglar uchun minnatdorman. Yigitlarga aytaman va saytinglarga kirib berishadi. Keyin buni o'zim o'qib chiqaman.

- Sizningcha qaysi hamkasblaringiz bunga loyiq edi?
- “Paxtakor”, “Bunyodkor” va “Lokomotiv” murabbiylarini ko'rsatgan bo'lardim. Ayniqsa “temiryo'lchilar” ikki bor hisobda ortda qolayotib, g'alabani o'z tomonlargi og'dirib olishgani etirofga loyiq.

- Boshqaruvingizdagi “Metallurg” safarda durang qayd etdi. Navoiydagi o'yin hususida nima deysiz?
- Uchrashuv shiddatli va murosasiz ruh ostida o'tdi. SHu kuni har ikki jamoaga ham g'alaba kerak edi. Uch ochko bilan qaytishimiz ham hech gap emasdi. Biroq ayrim vaziyatlarda yigitlarga sovuqqonlik etishmadi. Lekin durang ham yomon natija emas. Muhimi yutqazmadik.

- “Qizilqum” sobiq jamoangiz hisoblanadi. Aytingchi siz boshqargan jamoa bilan hozirgisini qanday farqi bor?
- Men bu jamoada 2003 yili ishlagandim. Albatta farqi bor. Tarkib borasida o'zgarishlarni ko'rish mumkin. Men ishlagan paytlarda Vyacheslav Ponomaryov, Marsel Idiatullin, Fayzulla Ahmedov, Odil Isaboev singari tajribali o'yinchilar bo'lgan. SHuningdek bugungi kunda “Metallurg”da o'ynayotgan Mamur Ikromov bilan Saidkomil Akbarov ham shunda “Qizilqum” jamoasida to'p tepgan. Hozir umuman boshqa tarkib. Klub yo'nalishi ham o'zgargan.