Rustam Mirsodiqov: "Oldinda hali javob o'yini bor"

- O'yin qanday kechganligini o'zlaring ko'rdinglar. Kubok uchrashuvi bo'lani bois bugun men ko'proq zaxirada o'tirgan futbolchilarga o'ynash imkoniyatini berdim. Buni tarkibimizda kimlar o'ynaganidan ham bilsa bo'ladi. Ushbu o'yin orqali zaxiramizdagi futbolchilarni tekshirib ko'rdik. Ertaga o'yin videoyozuvini ko'rganimdan so'ng uchrashuvni tahlil qilib kerakli xulosalarni chiqarishim mumkin. Bugun yutqazdik, shu bois o'yindan qoniqdim deya olmayman. Zaxira qolib ketayotgan o'yinchilar bunday imkoniyatdan foydalanib o'zlarini ko'rsatishlari kerak edi. Lekin unday bo'lmadi.
- Futbolda hamma narsa bo'lishi mumkin. Javob bahsida bugun o'ynay olmagan asosiy futbolchilarimizni maydonga tushiraman. O'z maydonimizda kerakli natijaga erishishga harakat qilamiz. Hozircha ustunlik andijonliklar tarafida. To'g'ri, chempionatda “Andijon”ni o'z uyimizda 5:1 hisobida mag'lubiyatga uchratdik. Bugun esa ularning qo'llari baland keldi. “Andijon”ni kuchsiz jamoa deb o'ylamayman. O'tgan turda ular Jizzaxda “So'g'diyona”ni engib qaytishdi. Futbolda oldindan bir nima deb bo'lmaydi.