Rustam Mirsodiqov: "Biz uchun g'alaba suv va havodek zarur edi"

Rustam Mirsodiqov, “Metallurg” FK bosh murabbiyi: Biz uchun g'alaba suv va havodek zarur edi. Ikkinchi davrani kutilmagan jarohatlar, tarkibdagi yo'qotishlar hamda futbolchilarning funkcional holati bilan bog'liq bo'lgan muammolar bois muvaffaqiyatsiz o'tkazayotgan jamoamizdan ishqibozlar faqatgina g'alaba kutishayotgandi desam, yanglishmayman. Bu safar ham tarkibni tuzishda qiyinchilikka duch keldik.

“Bunyodkor” bilan o'yinda hujumchimiz SHahzodbek Nurmatov jarohat olganligi bois maydonga tusha olmagan bo'lsa, Mirg'iyos Sulaymonov sariq kartochkalar bois mavsumdagi ikkinchi o'yinini o'tkazib yubordi. Yana bir hujumchimiz Sardor Rasulov esa betob edi. Xullas, hujum chizig'iga yoshlar terma jamoamiz nazoratida kelayotgan SHohnazar Norbekovni tushirdik va u umidimizni oqladi. Tajribali yarim himoyachi Ruslan Vagapov o'zini ko'rsatdi. Futbolchilarning ruhiyati bilan bog'liq muammolar ortda qoldi deb umid qilaman.

Bugun futbolchilardagi ishtiyoq evaziga 3 ochkolik bo'ldik. Keyingi o'yinlargacha asosiy futbolchilarimiz maydonga qaytishsa, muxlislarimizni albatta xursand qilishda davom etaveramiz.