Rustam Ashurmatovning onasi: "Farzandlarimiz bizning faxrimiz!"

Fursatdan foydalanib Rustam Ashurmatovning onasidan intervyu oldik.

"Farzandlar kamolini ko'rish, ularning orqasidan raxmatlar eshitish ota-onalar uchun tariflab bo'lmas quvonch. O'g'lim Rustamjonning shunday do'stlari, muxlislari borligidan boshim ko'klarga etdi.

Rustamjon yoshligidan boshqacha mehrli, beg'ubor bo'lib o'sgan. Bog'chada paytlaridanoq ustoz-murabbiylaridan raxmat eshitishni boshlaganman. Dadam nabirasining futbolchi bo'lishini juda xohlaganlari uchun uni olti yoshida futbolga olib borganlar. Tog'asi ham futbolchi bo'lganligi, bu kasbning og'ir taraflarini ko'rib yurganim uchun avvaliga rozi bo'lmagandim. Lekin Rustamjonning o'zi qiyinchiliklardan, mehnatdan qochmadi. SHu sababli ham bugun yuksak natijalarga erishib bizni judayam quvontiryapti.

Ayni dam qora ko'zini kutayotgan har bir onaning kechinmalarini birdek his qilyapman. Yigitlar ozmuncha harakat qilishmadi, Osiyo davlatlari ichidan yarq etib chiqishganining o'zi biz uchun cheksiz g'urur va iftixor bo'ldi. Baxtimizga doim sog'-omon, yurtimizning faxri bo'lib, baxtli zamonlarda o'ynab-kulib yurishsin. Farzandlarimiz bizning faxrimiz!".


Gulshan Sadullaeva yozib oldi