Ro'ziqul Berdiev: “Juda katta ish amalga oshirildi”

CHunki “Nasaf”ning bugungi kundagi bosh murabbiyi o'z vaqtida Kenjaev bilan birga to'p tepgan. Ro'ziqul aka shou o'yinida juda chiroyli gol urishga muvaffaq bo'ldi. Tadbir borasida uning fikrlari bilan ham qiziqdik.

-   Bunday o'ylab qarasak, juda katta ish qilindi. SHu o'rinda men championat.asia sayti rahbari Nodirxo'jaga, sayt jurnalistlariga, shu tadbir haqida tinmay chiqish qilib turgan “Futbol Ekspress” gazetasi tahririyatiga, qolaversa qashaqadaryolik faol jurnalistlardan biri Ziyodulla aka Safarovga o'zimning va klubimiz nomidan chuqur minnatdorchilik bildiraman. Bugun shu tadbir birinchi marta o'tkazildi, zaldagi muhit ham ajoyib bo'ldi. O'zbek xalqi mehr-oqibatli xalq, ko'rib turganingizdek hech kim Kenjaevning bir o'zini yolg'iz tashlab qo'ygani yo'q. Biz bundan keyin ham Kamoliddinga yordam berishga tayyormiz. Kamolning o'zi ham kelib xursand bo'lib ketdi.

-   Hozirgi yoshlar Kenjaevning o'yinlarini ko'rmagan. Yosh muxlislarga Kamoliddinni qanday tasvirlagan bo'lardingiz?
-   Kenjaev o'ng qanot himoyasida o'ynardi. Hozirgi futbolchilar bilan solishtiradigan bo'lsam, SHuhrat Muhammadiev kabi tezkor edi. Tez fikrlab, tez harakat qilishni maqul ko'rardi. Murabbiy tomonidan qanday ko'rsatma berilmasin, doim to'liq bajarardi. Hayotda qanchalik hazilkash va xushchaqchaq bo'lsa, maydonda o'ta jiddiy ishlardi. Kirishimli yigit edi, o'zini begonasirab o'tirmasdi.

-   Kenjaev avtofalokatga uchragan kunni eslay olasizmi? Sizga qanday tasir qilgandi?
-   Bu kunni eslagan har bir kishining xafa bo'lishi aniq. To'g'risi, Kenjaev shu holatga tushib qoladi deb sira o'ylamagandim. O'sha kuni bo'lgan voqeadan xabar topgach, darrov kasalxonaga etib bordim. Hatto o'zi bilan ham bemalol gaplashdim. Hech qaerida jarohatning izi yo'q bo'lib, faqat kuchli og'riq bo'lyapti degandi. Lekin afsuski, amaliyot yaxshi o'tmadi va futbolchi shu ko'yga tushib qoldi. Bu ham taqdirning bir sinovi ekan. Lekin Kamol juda bardoshli yigit, u hammasiga chidab kelyapti. Bu esa uning yaxshi inson ekanligidan dalolat beradi.

-   Kamoliddinning o'zi bilan gaplashganimizda bolalar futbolida ishlash niyati borligini aytib o'tdi.
-   Bu mavzuda men ham gaplashgandim. Unga o'z tumaningda to'p tepayotgan yosh futbolchilar bilan ishlamoqchi bo'lsang, bu borada “Nasaf” yordam berishga tayyor dedim. Bu gapdan Kenjaevning o'zi ham xursand bo'lib ketdi. Nasib qilsa, buni ham amalga oshiramiz.

Xayrulla Xoliqov