Ro'ziqul Berdiev: "Teng o'yinda uch ochko oldik"

- Bu o'yin qaysidir jamoani ustunligida o'tdi deyish qiyin. O'yin teng kurashlar ostida o'tdi. Eng asosiysi 3 ochkoni qo'lga kiritdik, - deb gap boshladi Ro'ziqul Berdiev.

- Bugungi g'alabaga futbolchilarimning tajribasi va mahorati ham  sabab bo'ldi deb o'ylayman. "Bunyodkor"ga qarshi bahsda ko'p kuch yo'qotganligimiz bugungi ko'rsatgan o'yinimizga o'z tasirini o'tkazmay qo'ymadi. "Andijon" bilan kubokda to'qnash kelgandik. Raqib jamoadagi har bir o'yinchini imkoniyatlarini yaxshi bilardik. Yaxshi o'yin tashkil qilib, g'alabaga erishishga muvaffaq bo'ldik.

- Bugun "Andijon"ga ochko juda zarur edi. Kubok o'yini bilan bugungi o'yinni taqqoslasak, katta farq sezilmadi. Lekin bugun raqiblarimiz kubokka nisbatan yaxshi o'yin namoyish etishdi. Ular g'alaba qozonishdi bizdan ko'ra ko'proq xohlashdi. "Andijon" bugungi o'yinga ruhiy tomondan yaxshi tayyorgarlik ko'ribdi. Ularda ham bir qancha imkoniyatlar bo'ldi. Bu imkoniyatlardan foydalanishlari mumkin edi. Bugun "Andijon" jamoasida ishtiyoq baland edi.

- Biz mavsum boshida Allaniyazovga ko'p imkoniyat berdik. Asosiy tarkibda ham o'yinlarda ishtirok etdi. Hujumchini asosiy vazifasi gol urishdan iborat. "So'g'diyona" bilan o'yinda hujumchimiz qizil kartochka olib, keyingi 2 ta turni o'tkazib yubordi. Allaniyazovning hozirgi holati bizni tashvishga solyapti. U o'tgan yilgi sermahsullikni ko'rsata olmayapti. Bugun o'zlaring guvohi bo'ldinglar, 3 metr masofadan to'p kirita olmadi. Bu menimcha ruhiyat bilan bog'liq. Uni o'zidagi ishonchi ozgina yo'qolgan. Men o'ylaymanki, bu o'tkinchi holat. Tezda o'z o'yiniga qaytishiga ishonaman.

- Biz kubok uchrashuviga mag'lubiyatga uchrash uchun kelmaymiz. Bizni oldimizda eng muhim uchrashuvlardan biri turibdi. Lekin bu degani kubokka etibor qaratmaymiz degani emas. Kubokdagi o'yinda jamoamizdagi o'yin amaliyoti kamroq bo'lgan o'yinchilarga imkoniyat beramiz.

Komiljon Ikromov yozib oldi.