Ro'ziqul Berdiev: "Qiyin g'alabani qo'lga kiritdik"

"Bugun juda qiyin g'alaba erishdik. G'alaba bilan muxlislarni tabriklayman. Barcha o'yinlar juda qiyin kechmoqda. Asosiysi, peshqadamlikni saqlab qola oldik. O'yinga keladigan bo'lsak, bugun ikki xil bo'limlarni guvohi bo'ldik. Birinchi taymda ko'proq hujumda o'ynadik. Ikkinchi bo'limda esa asosan natija uchun harakat qildik. "Lokomotiv" ko'p bor pozicion hujumda harakat qildi", - deya o'yin haqidagi fikrlari bilan o'rtoqlashdi Ro'ziqul Berdiev.

- "Nasaf" bugun juda ko'plab vaziyatlarga ega bo'ldi. Biroq yana o'sha muammo, imkoniyatlardan foydalanishda kamchiliklar etarlicha. Davralar oralig'ida yangi hujumchi sotib olish rejalashtirilganmi?
- To'g'ri, vaziyatlarni golda aylantirishda muammolarga duch kelmoqdamiz. Balki ikkinchi bo'limda yuzaga kelgan vaziyatlardan birini golga aylantirganimizda, o'yinning qolgan qismi osonroq kecharmidi. So'nggi paytlarda barcha "Nasaf"ning hujum chizig'ini va xususan Ilhom SHomurodovni tanqid qilmoqda. Lekin shuni unutmaslik kerakki, SHomurodov har doim jamoamizning kerakli va muhim gollarini kiritib kelgan. Uning o'yini murabbiylar shtabini qoniqtirmoqda. Bizda har bir vaziyatdan unumli foydalana oladigan hujumchini sotib olish uchun sharoitlarimiz to'g'ri kelmaydi. Biz ham istardik, yuqori saviyadagi hujumchini sotib olishni. Biroq bunga imkoniyatlarimiz etarli emas. SHaroitdan kelib chiqqan holda ish tutamiz. Davralar oralig'ida qaysidir futbolchini sotib olamiz deb vada bera olmayman.