Ro'ziqul Berdiev: “Bizda xavotir bor edi”

- Bugun nihoyat yaratilgan vaziyatlardan foydalana oldik, natijada g'alaba qozondik. Dastlab yigitlarda hayajon bo'ldi, ammo gol urib olganimizdan so'ng bu hayajon yo'qoldi va maydonda erkin harakat qilishdi. Bugun ishonchli g'alabaga erishdik. Albatta “Qizilqum” jamoasi tarkibida etarli darajada tajribali o'yinchilar bor, shu orqali bizda bugun xavotir ham bor edi. Biz futbolchilarimizga bugun raqibga nisbatan tezroq harakat qilishni uqtirgan edik. Futbolchilarimiz bu ko'rsatmamizni yaxshi bajarishdi. Bugun g'alabamiz bilan muxlislarimizni nihoyat xursand qila oldik deb, o'ylayman.

G'alaba biz uchun juda zarur va muhim edi. Bunga erishdik. Umuman biz futbolchilarimizga doimo g'alaba zarurligini uqtiramiz. Ammo o'yinda yaratilgan vaziyatlarni golga aylantira olmaslik, bizga doim pand beradi. Bugun bu narsaga chek qo'ydik. Jamoamiz tarkibida ikkinchi bosqich oldidan katta o'zgarishlar bo'ldi. Ayni paytdagi jamoamiz tarkibi, birga mashg'ulot o'tkazayotganiga va o'ynayotganiga ikki oy bo'ldi, xolos. Umid qilamanki, endi keyingi o'yinlarda ham ijobiy natijalarni qo'lga kiritamiz.