Rio Ferdinand: "Agar bu ikkisini birlashtirsak, dunyoning eng zo'r futbolchisi paydo bo'ladi"

Rioning fikricha, "Manchester Yunayted"dagi omadli startdan so'ng Van-Bissaka APLning eng yaxshi qanot himoyachilaridan biri deb hisoblanishi kerak.

"Kristal Pelas" sobiq azosi yozda "Old Trafford"ga ko'chib o'tganidan so'ng o'zini juda yaxshi ko'rsata oldi. Xususan, yaqindagina "Manchester Siti"ga qarshi kechgan uchrashuvdan keyin ham Aaronning o'yiniga yuqori baholar qo'yildi. O'shanda u Rahim Sterlingni zararsizlantira olgandi.

"Liverpul" azosi Aleksandr-Arnoldni ko'pchilik Premer-liganing eng yaxshi qanot himoyachisi deb hisoblaydi. Ferdinandning fikricha esa, Van-Bissaka o'yin darajasi bo'yicha Trentdan orqada emas.

"Agar bu ikki o'yinchi (Van-Bissaka va Aleksandr-Arnold)ni birlashtirsak, dunyoning eng zo'r futbolchisini qo'lga kiritamiz", - deya o'zining "Instagram" sahifasida savollarga javob berdi Ferdinand.

"Aaron yakka kurashlarda juda yaxshi. Uning Sterlingga qarshi qanday o'ynaganini ko'rdim, Rahim esa istagan raqibni aldab o'ta oladi. Lekin, Van-Bissaka bilan buni qilish unga katta qiyinchilik tug'dirdi.

Birga-bir o'yinda u kuch va tezlik borasida raqibga imkoniyatni boy bermaydi. Agar raqib undan qochmoqchi bo'lsa, podkat tashlaydi.

Agar "Manchester Yunayted"da talab qilinadigan bo'lsa, u 3 markaziy himoyachi taktikasida o'ngroqdagi joyni yopa oladi. Menimcha, u bu rolni qoyilmaqom tarzda bajara oladi.

U to'p bilan Trent kabi yaxshi harakat qila olmaydi, lekin Trent himoyada birga-bir o'yinda Aaronga katta farq bilan imkoniyatni boy beradi. SHunday ekan, agar ularni birlashtirsak, mukammal mashinaga ega bo'lamiz".

"Bu o'yinga bog'liq. Agar men ko'proq himoyalanishim va qaysidir vingerni yopishim kerak bo'lsa, unda men Van-Bissakani tanlayman".