Ravshan Ermatov: "Muxlislar stadionga qaytmoqda. Lekin hakamning birgina qarori barchasini bir pul qilishi mumkin"

Yig'ilishni  O'FA 1-Vice Prezidenti Ravshan Ermatovning shaxsan o'zi olib bordi va munosabatlarini bildirdi. Xususan, sobiq FIFA referisi dastlab VAR tizimiga to'xtaldi. 

"Hali ko'p mamlakatlarda yo'q VAR tizimini tadbiq qildik. Adolatni joyiga qo'yish, hakamlarni xatolardan himoya qilish uchun joriy qildik. Avvalgi zamonlarda bo'lgani kabi bittada ko'rish qiyin, ulgurmasligi mumkin. Hozir VAR bor, shu bilan xato qilsak odamlar nima deydi? Muxlislarni ishonchini oqlaymiz, deb harakat qilyapmiz. Futbolni sifatini oshirish uchun, odamlarni stadionlarga qaytarish uchun amalga oshirmoqdamiz. Hakamlik sifati futbol sifatidan pas bo'lmasligi kerak. Muxlislar kelib futboldan, hakamlar, murabbiydan rozi bo'lib sotib olgan chiptasiga minnatdor bo'lib ketishi kerak. Asosiy maqsadimiz ham shu.

Yoshlar, xalqaro musobaqalarni qabul qildik, muxlislar qaytmoqda. Lekin hakamning bitta qarori bir pulga chiqarishi hech gapmas. VAR arzon narsa emas, uning puliga qancha maydon qursak ham bo'lardi. Lekin hakamlarga yordamchi bo'lsin, xatosini to'g'irlasin deyapmiz",- deydi Ravshan Ermatov.