Ravshan Ermatov kim uchun omadli?

Bugun bo'lib o'tadigan "Nasaf" - "Paxtakor" uchrashuvini eng taniqli hakam Ravshan Ermatov boshqarib boradi. Unga qanotlarda Abdulhamid Rasulov bilan Jahongir Saidov yordam bersa, Ahrol Risqullaev bilan Valentin Kovalenko darvoza chizig'i yonidagi hakam vazifasini bajarishadi. Xullas bugungi o'yinda hakamlar ko'p.

Lekin hushtak Ermatovning qo'lida bo'ladi. Demak, u nima desa shu. Yaxshi bilasiz, Ravshan Ermatov "Paxtakor" ishtirokidagi o'yinlarga ko'p ham qo'yilmaydi. Bunga sabab sifatida Ermatovning "Paxtakor" uchun "omadsiz" hakam ekani tilga olinaveradi. Aslida ham shundaymi? Statistikaga murojaat qiladigan bo'lsak, bu hakam boshqargan o'yinlarda "Paxtakor" g'alaba qozongan, lekin mag'lubiyatga ham uchragan.

Keling, shu o'rinda Ermatov boshqargan "Paxtakor"ning oxirgi beshta o'yiniga etibor qaratsak. Ravshan Ermatov o'tgan yil "Paxtakor" ishtirokidagi atigi bitta bahsni boshqardi va jamoa "Dinamo" bilan 0:0 o'ynadi. Bu yil hisobidan esa birinchi marta boshqaradi.

Ermatov boshqargan oxirgi beshta uchrashuvda "Paxtakor" uch marta g'alaba qozonib, bittadan mag'lubiyat va durang qayd etgan. Qizig'i shundaki, 2015 yil Qarshida kechgan "Nasaf" - "Paxtakor" bahsini aynan shu hakam boshqargan va unda "Paxtakor" 1:0 hisobidagi g'alaba bilan qaytgan. Quyida oxirgi beshta o'yinni keltirib o'tamiz.

2015 yil
"Paxtakor" - "Lokomotiv" 2:1
"Nasaf" - "Paxtakor" 0:1

2016 yil
"Lokomotiv" - "Paxtakor" 1:0
"Paxtakor" - "Lokomotiv" 2:1

2017 yil
"Dinamo" - "Paxtakor" 0:0

Ana endi Ermatov boshqargan "Nasaf"ning o'yinlariga etibor qaratsak. Oxirgi beshta o'yinni yodga oladigan bo'lsak, "Nasaf" ikki bor g'alaba qozonib, ikki marta yutqazgan va bitta durang qayd etgan. "Nasaf" o'tgan turda "Bunyodkor" mehmoni bo'lib, 1:2 hisobida imkoniyatni boy berdi. SHu uchrashuvni Ermatov boshqarib bordi. Mana endi "Nasaf"ning ketma-ket ikkinchi o'yinida ham Ermatov va uning brigadasi hakamlik qiladi.

2017 yil
"Bunyodkor" - "Nasaf" 3:2
"So'g'diyona" - "Nasaf" 0:3
"Nasaf" - "Metallurg" 2:0

2018 yil
"Neftchi" - "Nasaf" 0:0
"Bunyodkor" - "Nasaf" 2:1

Umuman olganda Ermatov juda tajribali hakam. Uning uchun turning markaziy bahslarini boshqarish cho't emas. Biz esa ko'proq jamoalardan chiroyli o'yin kutib qolamiz. Mana shunday to'qnashuvlarda futbolchilar o'z salohiyatini namoyon etishini va gollar ko'p bo'lishini xohlaymiz.